Prej 13 janarit Altin Ndoci është një i arratisur dhe i kërkuar nga drejtësia shqiptare. Por teksa procesi vijon në mungesë të tij, të pandehurit e tjerë ia përmendën emrin duke rrëfyer planet që ishin bërë për ta vrarë.
Gjatë dëshmisë së tij rreth krimeve të “Plumbit të Artë”, Henrik Hoxhaj, i cili e ka humbur statusin e të penduarit, rrëfeu se kishte marrë porosi për të vrarë Altin Ndocin. Por plani i parë kishte dështuar për shkak të pandemisë së Covid-it. Porosia, shtoi Hoxhaj, ishte bërë nga Erjon Alibej, i cili është i akuzuar në të njëjtin fashikull të SPAK dhe njëherazi edhe një dëshmitar drejtësie.
“Bije shumë në sy”, e përshkroi situatën e atëhershme Hoxhaj, dhe ky ekspozim konsiderohej si pengesë për planin. Në rastin e dytë, përpjekjet për ta vrarë Altin Ndocin nisën pas arrestimit të tij.
“Ne jemi interesuar për ta vrarë Altin Ndocin me snajper brenda në burg. Nuredini e diskutonte me mua. Ishte në ëndrrat e Nuredinit, por nuk e kemi realizuar”, u shpreh Hoxhaj.
Ai është gjithashtu nën akuzë për një sërë ngjarjesh kriminale të zbërthyera nga i penduari tjetër, Nuredin Dumani. Henrik Hoxhaj pranoi se kishte marrë pjesë në vrasjen e Dorian Shkozës, një krim i kërkuar nga Erjon Alibej, të cilin të pandehurit e lakojnë me nofkën “Krymi”.
Së fundmi, edhe Alibej bëri pyetje për vrasjen e Olti Kilës. Hoxhaj pohoi se nuk kishte informacion përse Erjon Alibej synonte vdekjen e Olti Kilës, por shpjegoi se në një rast planet ishin thurur përmes aplikacioneve.
Në dosjen “Plumbi i Artë”, me tre dëshmitarët e drejtësisë – Nuredin Dumani, Erjon Alibej dhe Skerdi Tase – po ekspozohen vrasje dhe përplasjet mes grupeve të vendosura në Elbasan./TCH
