Real Madrid merr kryesimin e La Liga pas fitores bindëse 4-1 në shtëpi ndaj Las Palmas, në ndeshjen e javës së 20-të. Fillimi ishte tronditës për Los Blancos, të cilët u gjetën në disavantazh pas vetëm 30 sekondash falë golit të Fabio Silvës, por më pas Mbappé mori skenën: një penallti e shënuar (18’), asist për golin e Brahim Diaz (33’), dhe një dygolësh personal (36’). Rodrygo vulosi gjithçka në minutën e 57'. Ndërkohë, Athletic Bilbao barazon Barcelonën, në vendin e tretë, me fitoren 2-1 në fushën e Celta Vigo.
REAL MADRID-LAS PALMAS 4-1
Real Madrid merr kryesimin e La Liga pas një fitoreje të thellë 4-1 ndaj Las Palmas. Fabio Silva tronditi stadiumin “Bernabeu” pas më pak se 30 sekondash, duke shënuar pas një krosimi perfekt të Sandro Ramirez. Los Blancos nuk u dorëzuan dhe në minutën e 18' barazuan me një penallti të fituar nga Rodrygo dhe të kthyer në gol nga Mbappé. Më pas, në minutën e 33', kthesa u plotësua kur Cillessen bllokoi një goditje të Mbappé, por topi përfundoi te Lucas Vazquez, i cili i dha mundësinë Brahim Diaz të shënonte lehtësisht golin e 2-1. Vetëm tre minuta më vonë, Mbappé realizoi golin e tij të dytë me një goditje të menjëhershme pas një asisti të Rodrygo. Ai iu afrua edhe më shumë një triplete në pjesën e parë, por VAR-i dhe shtylla i mohuan dy gola të tjerë.
Lexo më tej: Mjekët e Real po kuronin Mbappé, Raphinha i heq çantën: veprimi ndez polemika
Në pjesën e dytë, Real e administroi ndeshjen pa vështirësi. Rodrygo shënoi golin e katërt në minutën e 57', ndërsa Las Palmas mbeti me një lojtar më pak pas kartonit të kuq të Benito Ramirez (64’). Dy gola të tjerë nga Bellingham dhe Valverde u anuluan për pozicion jashtë loje. Me këtë fitore 4-1, Real kalon Atletico Madrid dhe ngjitet në vendin e parë me 46 pikë, dy më shumë se rivalët e qytetit. Las Palmas mbetet në vendin e 14-të me 22 pikë.
CELTA VIGO-ATHLETIC BILBAO 1-2
Athletic Bilbao mposht 2-1 Celta Vigo në transfertë, duke arritur të barazojë Barcelonën në vendin e tretë të renditjes së La Liga. Pjesa e parë ishte e vakët, me të dyja ekipet që e kishin të vështirë të merrnin kontrollin e ndeshjes. Ritmi u rrit vetëm në minutat e fundit të pjesës së parë, e cila përfundoi 0-0. Në pjesën e dytë, Bilbao dominoi lojën, duke kaluar në avantazh në minutën e 62' me një asist të Inaki Williams për golin e ish-lojtarit të Torinos, Berenguer. Ekipi vendas nuk arriti të reagonte dhe në minutën e 71', Unai Gomez shërbeu për Vivian, i cili dyfishoi rezultatin.
Vetëm tre minuta më vonë, Celta ngushtoi diferencën falë një goli të Hugo Alvarez, por nuk pati forcën për të barazuar. Në fund të ndeshjes, Celta mbeti me 10 lojtarë pas kartonit të kuq të Mingueza për protesta. Athletic Bilbao ngjitet në vendin e tretë me 39 pikë, ndërsa Celta mbetet në vendin e 13-të me 24 pikë.
