Juventus i Thiago Motta futet në rifillimin e kampionatit pas pauzës ndërkombëtare me shumë siguri të grumbulluara në fushë: shtatë pikë, gjashtë gola të shënuar, zero të pësuar dhe një vend i parë në renditje bashkë me Inter që tashmë duket se paralajmëron një duel që do të zgjasë gjithë kampionatin. Megjithatë, në Continassa duhet të bëjnë llogaritë edhe me disa çështje jashtë fushës dhe rinovimi i Dusan Vlahovic duket se është më i rëndësishmi.
Siç raporton La Stampa, marrëveshja me numrin nëntë dhe stafin e tij është një çështje që Juventus dëshiron ta mbyllë shpejt. E elementët që duhen marrë parasysh për akordin përfundimtar duket se janë të natyrës ekonomike. Dusan Vlahovic mbërriti në bardhezi në janar 2022 nga Fiorentina për 70 milionë euro plus 10 milionë të tjera komisione dhe po aq bonuse. Serbi nënshkroi kontratë me bardhezinjtë deri më 30 qershor 2026 për 7 milionë euro me rritje, që në sezonin që sapo ka nisur janë bërë 12. Shifra është shumë më e lartë se politikat e reja të diktuara nga Ferrero dhe Giuntoli e kjo është arsyeja pse në Torino nisën reflektimet për një marrëveshje me kosto më të ulët.
PROPOZIMI...
Pika fillestare për mbylljen e çështjes së rinovimit është dëshira e përbashkët e klubit dhe stafit të sulmuesit që të mos hyjnë në vitin e fundit të kontratës pa arritur më parë një marrëveshje. Bisedat me menaxherin e serbit, Darko Ristic, nisën një vit më parë dhe Juventus është gati të ofrojë një zgjatje të paktën një ose dy sezone me një pagë pak më të ulët. Sidoqoftë, mes pjesës fikse dhe bonusit mund të arrihet ende mes 9 dhe 10 milionë neto në vit.
Këtë të shtunë Juventus do të luajë në Empoli dhe do të përpiqet të sjellë në shtëpi tre pikë për të qëndruar në krye të tabelës. Në krye të sulmit do të jetë Vlahovic tashmë me dy gola në kampionat dhe me një dëshirë të madhe për të bërë mirë edhe në funksion të rikthimit në Champions League. Ndërkohë jashtë fushës vijojnë kontaktet me agjentin e tij Ristic dhe janë planifikuar takime të reja me klubin. Bardhezinjtë duan të arrijnë një marrëveshje shpejt për të mbajtur sulmuesin e tyre të fokusuar në atë që ai bën më së miri: të shënojë dhe të ndihmojë Juventus të fitojë.
