Vazhdon në mënyrën më të dhimbshme të mundshme ndarja mes Kylian Mbappé dhe PSG. Sipas L'Equipe, në fakt, avokatët e kampionit francez dhe ata të klubit të Nasser Al-Khelaifi janë duke punuar për një çështje delikate ekonomike. Presidenti i klubit francez nuk i ka paguar Mbappé pagën e muajit prill dhe as një bonus që i takonte muajit shkurt. Në total, sulmuesi i Les Bleus i kërkon ish-klubit të tij rreth 80 milionë euro detyrime të prapambetura. Një veprim që e dinë mirë futbollistët në Shqipëri, që shpesh mbeten pa i marrë muajt e fundit të kontratës, kur largohen nga klubi i tyre. Por ja që ky variant paska shkuar deri te emiri katariot.
Shifra nuk është e rastësishme, por korrespondon me "bonusin e besnikërisë" që Mbappé tha se ishte gati të hiqte dorë për t'u rikthyer në skuadër verën e kaluar, pas thyerjes që lidhej me dëshirën e tij për të mos rinovuar kontratën. Al-Khelaifi kishte vendosur që gjithsesi t'ia paguante ato para sulmuesit të tij dhe më pas t'i kërkonte Real Madrid si kompensim. Klubi i Florentino Perez, natyrisht, refuzoi, duke mohuar çdo përfshirje në çështjen e mos rinovimit dhe kështu presidenti i parisienëve ka vendosur t'i mbajë direkt nga lojtari.
Lexo më tej: Video intime e audio kompromentuese: Policia bastis shtëpinë e Al Khelaifi, i denoncuar për pengmarrje e torturë
Historia mes Mbappé dhe PSG tashmë ka përfunduar zyrtarisht. Kontrata e tij skadon më 30 qershor dhe ai tashmë ka shpallur lamtumirën e tij, me Real që e pret krahëhapur. Megjithatë, tensionet nuk tregojnë shenja uljeje.
