Fundosën Kukësin por nuk bënë dot të njëjtën gjë me Teutën, në një derbi shumë të rëndësishëm për mbijetesën. Erzeni thyhet 3-0 në Niko Dovana, në javën e 26 të Kategorisë Superiore, duke këmbyer vendet me durrsakët. Lloci, Beqja e Daci bënë të pavlefshme cdo tentativë të skuadrës së Bejzades.
Rezultati i katërt pozitiv radhazi mes kampionatit e Kupës për Teutën, që e dinte se duhet të fitonte në këtë sfidë direkte për të shpresuar. Skuadra e Martinit e zhbllokoi takimin në minutën e 27′ në zhvillimet e një goditje këndi. Lloci mori pasimin e Jazxhi dhe mposhti portierin Hasanbelli. Erzeni u godit në moral dhe u rrëzua në minutën e 38′, kur Beqja shënoi edhe golin e dytë, duke e cuar Teutën në pushim me avantazhin e dyfishtë. Asisti i dytë i ndeshjes nga Artan Jazxhi.
Lexo më tej: Video/ Vllaznia tris në Klasike, dërrmohet Tirana: Balaj një lider, Hoxhallari katastrofik
Në pjesën e dytë, panorama e lojës nuk ndryshoi, megjithë përpjekjet e Erzenit. Daci shënoi edhe golin e tretë për Teutën në minutën e 53', duke e bërë pjesën e mbetur të lojës, një administrim të pastër. Erzeni u mundua të reagonte por rezultati ishte shumë i rëndë. Mihana në minutën e 86' pati shansin më të mirë për të ngushtuar diferencën, por Vata ishte i pakalueshëm.
Parakalim i kompletuar i Teutës, që ndryshon vendin në renditje me Erzenin. Vendi i 8 me 28 pikë për të besuarit e Martinit, në zonën playoff tashmë, ndërsa Bejzade zbret në atë të rënies me 26 pikë.
