“KF Tirana njofton ndërprerjen me konsensus të bashkëpunimit me mesfushorin Ardit Hila. Klubi dhe lojtari kanë shtrënguar duart në fundin e këtij rrugëtimi. Falenderojmë Hilen për kontributin e tij dhe i urojmë suksese në të ardhmen e tij”. Pak fjalë për të zyrtarizuar një largim që tashmë ishte i ditur. Lojtari kishte pakënaqësitë e tij, më së shumti financiare, klubi e konsideroi problematik në sjellje. Mesfushori sidoqoftë nuk u tërhoq nga pozicioni i tij, i fortë edhe nga akordi verbal me Elbasanin.
Në këtë pikë, edhe pse nuk mundet të bëjë përforcime për të kompletuar të paktën të larguarit, për shkak të detyrimeve që duhet të paguajë për të zhbllokuar merkaton, Tirana vendosi ta lejojë 31 vjeçarin të vazhdojë karrierën e tij diku tjetër. Tani tekniku Julian Ahmataj duhet të bëjë llogaritë me dy lojtarë më pak në organikë, për gjysmën e dytë të sezonit. E fatkeqësisht për të, si Hasani ashtu dhe Hila, të dy titullarë.
Lexo më tej: Tirana nuk paguan, merkato mbetet e bllokuar: Hila ikën, Ahmataj duhet tia dalë me ata që ka
Hila ka zgjedhur të transferohet te Elbasani, në Kategorinë e Parë, me klubin e vendlindjes së tij që aspiron rikthimin në Superiore. Verdheblutë janë aktualisht në vendin e dytë që të ngjit direkt, me 36 pikë -3 nga kryesuesit e Bylis. Një zbritje në nivel për nënkampionin e vendit, por që ngushëllohet me pagesat e sigurta.
