Merkato dimërore po afron dhe të ashtuquajturat thashetheme për transferimet nisin menjëherë të qarkullojnë. Emri i madh që është shfaqur ditët e fundit është ai i Toni Kroos. Gjermani shkon në skadencë kontrate me Real Madrid dhe po kërkohet nga disa klube, përfshirë Juventus. Në këtë drejtim duket se mesfushori i ka të qarta idetë për të ardhmen e tij.
TONI KROOS TE JUVENTUS?
Lajmi që ka qarkulluar ditët e fundit është se Giuntoli po punon me dritat e fikura për ta bindur të pranojë ofertën e Juventus në verë, kur i skadon kontrata me Los Blancos. Do të ishte një goditje e shkëlqyer pavarësisht se gjermani nuk është më shumë i ri. Megjithatë, dy janë faktorët që e bëjnë një operacion të komplikuar. Së pari paga, aktualisht në Madrid ai fiton gati 12 milionë euro neto në sezon (merr rrogën më të lartë). Në Torino rroga e tij praktikisht duhet të përgjysmohet. E, më pas, një faktor tjetër që nuk duhet nënvlerësuar është mosha. Në fakt ai do të mbushë 34 vjeç më 4 janar dhe për një shoqëri që ka vendosur të fokusohet tek Next Gen nuk do të ishte një zgjedhje koherente.
Lexo më tej: Video/ Një mi driblon Kroos e gjermani tërbohet: imazhet janë vërtetë zbavitëse
KROOS-REAL MADRID, NJË DASHURI E PËRJETSHME
Me pak fjalë, vështirësitë janë të shumta, pavarësisht se Zonja e Vjetër iu rekomandua atij nga miku dhe bashkatdhetari Sami Khedira. Edhe ai nga merengues kaloi në Torino ku jetoi një rini të dytë. Sipas Sportitalia, me qëndrimin e teknikut Ancelotti në Madrid, Kroos mund të mbetet ende fari i mesfushës së tij. Synimi i drejtuesve të Los Blancos është që t'i ofrojë një rinovim edhe për një vit. Një propozim që Toni do ta pranonte me dëshirë duke pasur parasysh lidhjen e tij me klubin spanjoll. Ndjesia është se historia e dashurisë mes Kroos dhe Real Madrid është e destinuar të vazhdojë.
