Superkupa e humbur me Partizanin duket se ka lënë pasoja te Egnatia, që ka bërë mbylljen më të keqe të mundshme, një viti deri tani i jashtëzakonshëm. Rrogozhinasit turpërohen në shtëpi 0-5 përballë Tiranës, që mbron vendin e tretë nga presingu i Vllaznisë. Në avantazh me golin e Haxhiut, Tirana shpërtheu në 20 minutat e fundit të ndeshjes. Vendimtar megjithatë ishte kartoni i dytë i verdhë i Aleksit, që la Egnatian me 10 lojtarë. Latifi pastaj shënoii dygolëshin personal, Haxhiu e pasoi në nivel individual me golin e dytë dhe Abazaj iu bashkua festës në fund.
Turpërohet keq Egnatia në Rrogozhinë me rezultatin e thellë 0-5, e rëndë për një skuadër që kryeson kampionatin dhe vinte nga një seri prej 10 ndeshjesh pa humbje. Në javën e 18 të Superiores, e fundit e vitit 2023 dhe fazës së dytë të kampionatit, Tirana demostroi forcën. duke u afruar në -11 nga kreu. Ahmataj sidoqoftë mbrojti vendin e tretë dhe i bëri nder Partizanit, që mund ta mbyllë vitin, pas trofeut, edhe -1 nga kreu.
HAXHIU PROTAGONIST
Sfida nisi mjaft mirë për të dyja skuadrat, agresive në kërkim të rezultatit. Bardheblutë arritën të gjenin golin në pjesën e parë me Rimal Haxhiun, në minutën e 25. Një asist i Deliut nuk u gabua nga anësori, që po tregon nivel të lartë në mundësitë që i jepen. Egnatia mundohet të reagojë, por është nervoze për të menduar kthjellët. Tirana, në anën tjetër, e ka lojën përpara dhe tenton ta mbyllë me Deliun e Haxhiun, që shënoi edhe golin e dytë, të anuluar për pozicion jashtë loje.
ALEKSI LA NË BALTË EGNATIAN
Tetova u mundua të shkundë të tijtë, por ndeshja mund të thuhet se u vendos në minutën e 67'. Aleksi, tepër i karikuar kundër ish-skuadrës së tij, mori kartonin e dytë të verdhë, duke lënë fushën përpara kohe. me 10 lojtarë pastaj, Egnatia nuk ekzistoi më. Tirana pati nevojë vetëm për 60 sekonda në superioritet për të dyfishuar rezultatin. Latifi, në pasimin e Lushkjas nuk gaboi, duke bërë 0-2. Në minutën e 78', Haxhiu bëri tris, me golin e dytë personal në ndeshjes, ndërsa Abazaj shënoi emrin në listën e shënuesve në minutën e 82'. Dygolësh edhe për Latifin në minutën e 87', duke i shkaktuar Egnatias humbjen më të rëndë që kur është ngjitur në Superiore.
Lexo më tej: Erzeni, ndeshja e fundit e Abilaliajt: Shehi trajneri i ri i Partizanit, prezantimi javën e ardhshme
Tirana rimerr vendin e tretë, në fund të 2023 me një fitore që është shumë premtuese për gjysmën e dytë të sezonit. 26 pikë për bardheblutë, gjithësesi 11 pikë larg Egnatias, që mban titullin e kampionit të dimrit me 37 pikë, të njollosur me një disfatë totale.
