Pas surprizës në Rrogozhinë, Teuta është kthyer në vështirësi e mundur 0-1 nga Erzeni në Niko Dovana. Durrsakët janë mposhtur në derbin e javës së 8 në Kategorinë Superiore, duke komplikuar përsëri renditjen. Kacbufi vendosi ndeshjen me një gol në minutën e 79'. Shijakasit panë gjithashtu t'i anullohet edhe një gol në pjesën e parë, për pozicion jashtë loje të Kahrimanovic.
Në Durrës u luajt një derbi shumë emocionues, me raste shënimi, gol të anulluar e një realizim dramatik 10 minuta nga fundi. Dy skuadrat vinin nga momente të ndryshme: ajo e Martinit nga fitorja me kryesuesit e ajo e Deliallisit pas dy humbjeve radhazi. Impakti me ndeshjen ishte më i mirë për Erzenin, që mori avantazhin në minutën e 43'. Sa keq që Kahrimanovic ishte në pozicion jashtë loje dhe goli nuk vlente.
Shijakasit insistuan përpara, pa u zbilancuar. Kundërsulmi i Teutës mund të bënte keq. Deliallisi mbrojti me kujdes, me trajtim special sidomos ndaj Filit. Tepër i insistuar ishte Kahrimanovic, me mesfushorin kroat që shërbeu në minutën e 79′ për golin e fitores. Kacbufi ishte aty, i gatshëm të depozitonte në rrjetë avantazhin 0-1.
Një gol që vlen tre pikë e kthen Erzenin te suksesi. Shijakasit ngjiten në vendin e 6 me 11 pikë, ndërsa Teuta mbetet e treta nga fundi, me 8 pikë, një më shumë se Dinamo e Kukësi që mbyllin renditjen.
[video width="688" height="324" mp4="https://cdnimpuls.com/lapsi.al/wp-content/uploads/2023/10/Kacbufi-gol.mp4"][/video]
