Një mënyrë për t'i uruar një udhëtim të mbarë përtej. Ky ka qenë me shumë gjasa synimi i Curva Sud të Milan, që përpara stadiumit Meazza i dha lamtumirën e fundit ish-presidentit (historik) Silvio Berlusconi. Pishtarë dhe tymuese për të krijuar një lloj rruge, si për të shoqëruar për herë të fundit njeriun që e bëri të madh klubin e tyre të zemrës.
29 trofe në 31 vite pronësi, nga 1986 deri në 2017. 8 tituj, 5 Kupa Kampioni/Champions, 5 Superkupa Uefa, 1 Kupë Italie, 7 Superkupa Italie, 2 Kupa Interkontinentale, 1 Kupë Bote për Klube. Pronari më i suksesshëm i historisë së AC Milan. Natyrisht, kuqezinjtë mundën vetëm ta falënderojnë Silvio Berlusconi, duke i bërë homazhe me këtë rrugëtim të ndërtuar me pishtarë. Pikërisht përpara atij që ishte stadiumi i kaq shumë sukseseve. "Një president, ka vetëm një president!", ishte kori i thirrur nga mbështetësit e Milan, për të përsëritur mirënjohjen e tyre ndaj Silvio Berlusconi.
Lexo më tej:
Lamtumirë Berlusconi: nga Milan te Monza, triumfet e Presidentit që revolucionarizoi futbollin
LAMTUMIRA NË FUNERAL: SHUMË FYTYRA TË NJOHURA E TIFOZË
Dje, e mërkurë 14 qershor, funerali u bë në Piazza Duomo në Milano. Shumë fytyra të njohura, yje të spektaklit, televizionit dhe sportit, por edhe figura të rëndësishme politike i dhanë lamtumirën e fundit presidentit Berlusconi. Krahas tyre, edhe qytetarë të shumtë “të zakonshëm” nuk kanë dashur të mungojnë në ceremoni. Madje kanë kaluar mbi 10 mijë të pranishëm. Përfshirë shumë tifozë, veçanërisht nga Milano dhe Monza: dy skuadrat e tij të preferuara.
Me ndarjen nga jeta të Silvio Berlusconi mbyllet një kapitull i rëndësishëm i historisë italiane, futbollit dhe jo vetëm. Një personazh që shënjoi dekadat e fundit të Italisë, për disa për mirë, për të tjerë për keq. Por sigurisht që ka lënë kujtime të ëmbla për të gjithë milanezët, të cilët kanë dashur ta përshëndesin siç duhet për herë të fundit.
