Italia vazhdon të prodhojë skandale. Një akuzë shumë e rëndë ka ardhur nga Emanuele Filiberto i Savojës. Presidenti i Real Aversa, skuadër e kampionatit Serie D ka akuzuar hapur rivalët e djeshëm të Ragusa. Ndeshja ishte shumë e rëndësishme për qëndrimin në kategori, aq sa të arrihej deri në helmimin e kundërshtarit. Në një deklaratë zyrtare, presidenti i kampanëve deklaroi se skuadra ishte helmuar para ndeshjes. E për këtë arsye u detyrua ta luante ndeshjen me një formacion të improvizuar.
Klubi Campania po kërkonte dëshpërimisht pikë në transfertë ndaj Ragusa, për të shmangur rënien në Eccellenza. Por në orët para ndeshjes disa lojtarë pësuan një sëmundje të çuditshme. Kështu, një formacion i improvizuar doli në fushë (si portier u vendos një lojtar red.), që humbi 6-0 dhe dështoi të arrinte shpëtimin. “Ajo që ndodhi dje është diçka e padëgjuar - tha Filiberto -. E, nga këndvështrimi im, është gjithashtu një sulm ndaj personit tim si dhe ndaj qytetit të Aversës. Nuk mund ta imagjinonim kurrë që gjëra të ngjashme mund të ndodhin në vitin 2023. Ata helmuan ekipin tim”, shpjegoi Filiberto në shënim.
“Vendosëm të dërgonim ekipin në grumbullim në Ragusa, në një hotel të njohur të qytetit. Idea ishte të ambjentoheshin, duke qenë një qytet 600 metra mbi nivelin e detit - vazhdoi Emanuele Filiberto -. Nuk dua të bëj ndonjë konkluzion, por e vetmja gjë e sigurt është se lojtarët tanë janë të gjithë në spital. Gjatë rrugës së kthimit, pas shumë ndalesave për të vjella, u desh të dërgoheshin në spitalin e Salernos. E fatkeqësisht të gjithë u shtruan në spital”. Kërkesat e klubit për shtyrjen e ndeshjes ishin të kota.
MJEKU I SPITALIT ISHTE EDHE MJEKU I RAGUSA
Në spital para ndeshjes, mjeku që ekzaminoi lojtarët nuk e vlerësoi të nevojshme shtrimin e tyre në spital. Ai doktor, sipas Filibertos, u shfaq më pas në pankinën e Ragusa: “Ai që i vizitoi në spital dhe refuzoi t'i ndihmonte lojtarët tanë, në orën 15.00 ishin në fushë gati për t'u ulur në pankinë si mjeku i ekipit të Ragusa. Si ka mundësi që të ndodhin gjëra të ngjashme... një mjek në një institucion publik që për t'i sjellë avantazh ekipit të tij, vë në rrezik sigurinë e një ekipi të tërë. Unë sinqerisht shpresoj që të mos ishte i njëjti doktor, por të ishte vetëm një sozi. Përndryshe do të ishte vërtet një gjë shumë e rëndë”.
