Massimo Ambrosini ka vendosur të hapet me ndjekësit e tij dhe të tregojë dramën e sëmundjes së djalit të tij: "Prej gjashtë muajsh jeta ime dhe e familjes është përmbysur fjalë për fjalë. Kjo nga sëmundja e djalit tonë më të vogël - ishin fjalët e ish-mesfushorit të Milanit në një video –. Alessandro u diagnostikua me diabet të tipit 1, që është një sëmundje autoimune, kronike dhe degjenerative. E që, edhe pse nuk duket mund të ketë pasoja shumë të rënda”.
Ambrosini nuk e kishte mbajtur asnjëherë të fshehur gjendjen e fëmijës. E megjithatë postimi në kanalin e tij në Instagram ishte një mundësi për të folur për herë të parë publikisht. Ish-lojtari i kuqezinjve ka kërkuar edhe mbështetje për kërkime shkencore kundër sëmundjes.
Lexo më tej: Zaccheroni operohet në kokë, i heqin një hematomë: trajneri kampion me Milan përplasi kokën pas një rrëzimi
“Jemi të detyruar vazhdimisht të monitorojmë gliceminë e tij - tha Ambrosini -. Madje i bëjmë injeksione insuline disa herë në ditë, çdo ditë. Për momentin diabeti i tipit 1 është një sëmundje e pashërueshme. Por ka një shpresë që kalon vetëm dhe ekskluzivisht përmes kërkimit shkencor. Unë, gruaja ime dhe të gjithë të afërmit e 200,000 personave mes të rriturve e fëmijëve që kanë këtë sëmundje, kemi nevojën dhe vullnetin që të arrihet në një kurë përfundimtare. Kjo është arsyeja pse vendosa të vrapoj në Maratonën e Milanos, së bashku me disa nga ish-shokët e mi të skuadrës. Duam të mbështesim Fondacionin Italian të Diabetit. Së bashku djema mund dhe duhet të gjejmë një kurë për këtë sëmundje”.
