Ndeshje e çmendur mes Omanit dhe Jemenit, zhvilluar pasditen e sotme në Kupën e Gjirit. Në këtë turne, nga 6 në 19 janar, marrin pjesë kombëtaret e vendeve të Gjirit Persik. Ndeshja, e vlefshme për ditën e dytë të turneut që po zhvillohet në Irak, ka përfunduar me rezultatin 3-2. Një ndeshje plot gola e karakterizuar edhe nga një episod kurioz i ndodhur gjatë pjesës së parë. Autori i dy gafave që i kushtuan kombëtares së tij po aq gola të pësuar, portieri i Jemenit, Ali Fadhl Abbas Ahmed, ishte protagonisti i një gjesti të veçantë.
Kombëtarja e Jemenit, e mposhtur 2-0 në debutimin e saj kundër Arabisë Saudite, pësoi gol menjëherë kundër Omanit. Avantazhi i kombëtares së Omanit në fakt ishte një dhuratë nga portieri Ali Fadhl Abbas Ahmed. Ai, në përpjekje për të paraprirë një kundërshtar, e rrëshqiti topin në portën e tij.
Më pas erdhi reagimi i Jemenit, që mes minutave 12' dhe 30' përmbysi situatën duke e bërë 2-1. Një reagim që megjithatë nuk duhet ta ketë qetësuar shumë portierin. Ali Fadhl Abbas Ahmed, në minutën e 36' la t'i shpëtojë një top i goditur nga distanca, për golin e barazimit të Omanit.
PORTIERI KËRKON ZËVENDËSIMIN
Në këtë rrethanë, materializohet i gjithë zhgënjimi i portierit të Jemenit. Dukshëm i zemëruar, ai kërkoi haptazi një zëvendësim nga trajneri i tij. Një episod pak të thuash unik, që megjithatë nuk ndikoi aspak në planet e trajnerit, që vendosi ta linte në fushë.
Menjëherë pas kësaj, Omani pati mundësinë të kalonte sërish në avantazh me 11 metërsh. Arshad Al-Alaëy u çorientua nga portieri jemenas dhe e goditi topin mbi traversë. Fati? Karma? Jo saktësisht: Omani gjeti golin e 3-2 në fillimin e pjesës së dytë. Befasia e fundit megjithatë erdhi në minutën e 87, kur Mohammed Abdullah Al-Dahi humbi penalltinë e barazimit të mundshëm, duke dënuar Jemenin me humbjen e dytë në dy ndeshje.
JEMENI JASHTË KUPËS SË GJIRIT
Turneu, i fituar herën e fundit nga Bahrein, parashikon që ekipet kombëtare të klasifikuara në dy vendet e para të kalojnë grupet. Në grupin A, Iraku dhe Omani janë me 4 pikë, duke eliminuar Jemenin nga Kupa e Gjirit. Në sport dihet që gabimet janë pjesë e lojës, por, duke gjykuar nga hidhërimi që e kapi gjatë ndeshjes, ndjesia është se gabimet që i kushtuan humbjen e kombëtares, portieri Ali Fadhl Abbas Ahmed nuk do t'i harrojë lehtë.
