Gjykata Speciale e Hagës, ka arrestuar në Belgjikë, një ish-pjesëtar të Ushtrisë Çlirimtare të Kosovës. Sipas Gazeta Express, presoni i arrestuar është Pjetër Shala, i njohur në luftë me nofkën “Komandant Ujku”.
Shala është arrestuar pas një urdhërarresti nga Gjykata Speciale, ku ndër të tjera thuhet se ai do të mbahet në Belgjikë deri në transferimin e tij në Hagë.
Njoftimi i plotë:
“Më 16 mars 2021, autoritetet e Belgjikës arrestuan Pjetër Shalën në zbatim të fletarrestimit dhe aktakuzës së konfirmuar për krime lufte, lëshuar nga Gjykatësi i Procedurës Paraprake i Dhomave të Specializuara të Kosovës. Pjetër Shala do të mbahet i ndaluar në Belgjikë, në pritje të transferimit të tij në objektin e paraburgimit të DHSK-së në Hagë. Së shpejti do të jepet më shumë informacion ku do të përfshihet edhe informacion për nxjerrjen publike të aktakuzës së konfirmuar me redaktimet e nevojshme. Në bazë të rregullës 88 të Rregullores së Procedurës dhe Provave, aktakuza bëhet publike jo më vonë se paraqitja e parë e të akuzuarit,”-thuhet në njoftim.
