Kreu i Lëvizjes Vetëvendosje, Albin Kurti thotë se në rast se do të mbahej një referendum për bashkimin e Kosovës me Shqipërinë, ai do të votonte “pro”. Në një intervistë për Euronews, Kurti tha se e mbështet ende idenë e bashkimit kombëtar.
“Ne ende nuk kemi ligj për referendumin në Kosovë, por dy referendume ndërmjet shtetit tonë dhe Shqipërisë do ta zgjidhnin një gjë të tillë. Sapo të forcohej shteti i Kosovës. Pasi të arrijmë ta bëjmë këtë në mënyrë paqësore dhe demokratike. Mendoj se do të votoja pro. Po”, - deklaroi Kurti.
Ai foli edhe për vazhdimin e dialogut Kosovë - Serbi, për të cilin ka thënë se do kërkojë reciprocitet.
“Jam gati të përfshihem në një dialog ku ka përfitime, por mendoj se nuk është e pranueshme për askënd në Kosovë, natyrisht duke përfshirë edhe mua që të përfshihem në një dialog ku supozohet se do të kompensojmë shtetin e Serbisë për humbjen e këtij shteti gjatë kohës së Millosheviçit. Serbia kreu gjenocid në Kosovë”, - deklaroi i pari i VV-së.
Kurti ka kundërshtuar mundësinë e furnizimit të Kosovës me vaksina anti-Covid nga Kina dhe Rusia, duke argumentuar se orientimi i Kosovës çdoherë ka qenë Perëndimi. ©LAPSI.al
