Pasditja e kësaj të marte ishte një “luftë” në distancë mes Edi Ramës dhe Lulzim Bashës që kur kanë mbetur pak më shumë se 2 muaj nga zgjedhjet kanë shtuar tonet e akuzave ndaj njëri – tjetrit. I pari ishte Basha që publikoi një video në rrjetet sociale ku akuzonte Ramën se “kishte dështuar në 8 vite dhe se tani po bënte të tjera premtime boshe”. Reagoi Rama në Facebook se “i duhej një mandat i tretë për të mbyllur procesin e rindërtimit dhe vaksinimin e gjithë popullsisë”. Në mbrëmje ishte sërish Basha që renditi të gjitha ato që sipas tij ishin dështimet e Ramës.
“Edi, njerëzit e sojit tënd përpiqen t'i bindin të tjerët se po të kenë edhe 4 vjet kohë do të arrijnë gjithçka. Por e vërteta është se kjo nuk ndodh kurrë. Nuk ndodhi as pas 4 viteve të para, por prapë i kërkove Shqipërisë të ta jepte timonin vetëm. E more edhe 4 vjet të tjerë dhe prapë e le në vend numëro. Ti e ke lënë Shqipërinë në baltë, Edi.
Ekonomia ka ngecur. Premtove ulje taksash dhe çmimesh por dështove dhe i rrite taksat dhe koston e jetës për çdo shqiptar. Punësimi ka ngecur. Premtove 300 mijë vende pune por dështove dhe largove qindra mijë nga puna. Shëndetësia ka ngecur. Premtove shëndetësi falas dhe e çove në kolaps e i grive shqiptarët nga xhepat para dhe gjatë pandemisë. Hyrja në Europë ka ngecur. Premtove hapjen e negociatave para 8 vitesh dhe vetëm sa shtove kushtet prej dështimeve të tua” – shkruan Basha.
Më pas Basha thotë se një mandat i tretë Ramës nuk i duhet për shqiptarët, por për veten e tij.
“Edi ti kishe 8 vjet pushtet si askush para teje dhe pas 8 vjetësh vendi ka ngecur vendnumëro. 4 vite të tjera nuk të duhen për shqiptarët, sepse për ta nuk të bëhet vonë. 4 vjet të duhen për vete dhe ortakët e tu që pasurohen me milionat e tenderave dhe koncesioneve korruptive. Shqipëria nuk e ka luksin të të japë edhe 4 vite të tjera, që të përfundojë sërish si në fund të këtyre 4 viteve. Ngecur vend numëro, pa të ardhme, pa shpresë, pa ëndrra. Ik rri me familjen tënde. Shqipëria do të ecë para dhe tani që të gjithë e dinë se kjo nuk mund të ndodhë me ty” – shkruan Basha. ©LAPSI.al
https://lapsi.al/2021/02/16/edi-rama-tregon-arsyet-perse-i-duhet-nje-mandat-i-trete-askush-tjeter-vec-meje-nuk-ka-fuqi-dhe-eksperience-ne-drejtimin-e-vendit/
https://lapsi.al/2021/02/16/basha-kemi-plane-serioze-per-vendin-nuk-do-te-kerkojme-nje-mandat-tjeter-nese-nuk-i-permbushim-angazhimet-tona-ndaj-qytetareve/
