Arrestimi i mjekut Edvin Prifti dhe i disa infermierëve, që merrnin ryshfet në spitalin infektiv, duket se e kanë vënë në një pozicion të vështirë retorikën e Ministres së Shëndetësisë, Ogerta Manastirliu, që kur bëhet fjalë për mjekët, nuk sheh njerëz të zakonshëm, por vetëm "heronj".
Për këtë arsye në rrjetet sociale ka nisur një fushatë intensive për të reklamuar sakrificën e punës së tyre të përditshme, përmes disa fotove, që i tregojnë në kushte të vështira, sidomos këto ditë kur ka pasur reshje të shumta bore.
Por në përpjekje për t'i zhveshur mjekët nga dobësitë njerëzore, ata janë vënë të pozojnë në situata qesharake, kur pacientëve iu matet tensioni jashtë në terrene me borë, apo kur mjekët qëndrojnë në të ftohtë, duke pozuar për aparatin fotografik, të veshur me përparësen e bardhë. Për të kuptuar se si janë pritur këto foto, mjafton të lexohen disa prej komenteve, poshtë tyre.
