Një familje në fshatin Starovë të Pogradecit është ngritur e tmerruar në mes të natës nga shpërthimi i tritolit në oborr.
Ka qënë familja e Petrit Çekiçit, 53-vjeçarit që banon në këtë fshat, që në orën 3 e gjysëm të natës ka dëgjuar zhurmën dhe ka dalë jashtë, fatmirësisht e palënduar.
Policia tha se shpërthimi nuk ka shkaktuar as dëme materiale.
Nuk dihet ende pse është hedhur kjo sasi e vogël eksplozivi në këtë familje, që deri tani duket se ka qenë vetëm një paralajmërim.
“Më datë 13.02.2021, rreth orës 03:30, në fshatin Starovë, Pogradec, në oborrin e banesës së shtetasit Petrit Çekiçi, 53 vjeç, ka shpërthyer një sasi e vogël lëndë plasëse, e cila nuk ka shkaktuar dëme në njerëz apo dëme materiale”, thuhet në njoftimin e policisë.
Dyshime janë ngritur në dy pista: konfliktet e djemve të familjes dhe një hakmarrje për vrasjen e kryer nga nipi i Çekiçit në vitin 2014. Megjithatë, hetimet vazhdojnë.
