Njëri prej protestuesve të Aleancës për Mbrojtjen e Teatrit, i cili u ndalua mbrëmjen e së shtunës nga policia është koreografit Donald Martini. Në protestën që u mbajt sot përpara Ministrisë së Brendshme ai ka rrëfyer për mediat se si u dhunua në ambientet e komisariatit.
“Na futën në polici. Njërit prej nesh i gjuajtën me shpullë. Kjo është dhunë, por në Shqipëri ndodh. Unë i thashë se kam edhe shtetësi angleze. Më tha ulu dhe kur jam ulur, më gjuajti me shkelm. Nuk isha mirë fizikisht, por më pas personi që më goditi u largua menjëherë që ai mos të shihej. Më tej kisha pak dhimbje.
Një oficer më tha se “plaga jote ka 5 orë”. I thashë: “Po pse gjaku më rrjedh?”. Pastaj erdhi shefi i komisariatit dhe u qetësua situata, por ishte vonë. Është e pakonceptueshme që të shoqërohesh në komisariat, pse proteston. Unë protestoj në radhë të parë për fëmijët e mi, pastaj për të gjithë. Këtu vritesh edhe pa motiv. Do ta hedh në gjyq rajonin e policisë. Kërkoj reagim edhe nga ministri i ri i Brendshëm”, - deklaroi pedagogu i artit Martini.
Mbrëmjen e së shtunës ai u ndalua së bashku me Astrit Seranajn, Ergys Mërtirin dhe Gentjan Hasanin. ©LAPSI.al
