Në një absurd të paparë dhe të padëgjuar ambasadorja amerikane në Tiranë ka fshikulluar ish-pushtetarët që mund të nxisin dhunën me rastin e protestave që shoqëruan vrasjen e të riut 25-vjeçar, Klodian Rasha.
Aq diplomatike dhe e ekuilibruar është treguar Yuri Kim, sa me këtë rast ndërhyrja e saj është përshëndetur edhe nga njëri prej gazetarëve më indipendentë dhe më të paanshëm që ka peizazhi shqipfolës, Carlo Bolino, i cili pak ditë më parë publikoi një sondazh në Report TV ku thoshte se Rama i fitonte zgjedhjet me 60% (pra shumë më thellë se në 2017/shiko poshtë).
“Sot për herë të parë në një deklaratë publike, ambasadorja amerikane Yuri Kim iu drejtua” ish-pushtetarëve pa i përcaktuar ata si “opozitë”. “Ata që ishin në pushtet më parë nuk duhet të bëjnë gabimet e së kaluarës, duke sugjeruar se dhuna është e pranueshme”, - shkroi ajo në një deklaratë të lëshuar nga ambasada në gjuhën shqipe, mbase për të shmangur atë që në përkthimin nga anglishtja mund të humbasë këtë detaj” - ka nënvizuar Bolino në editorialin e tij.
Lexo me tej:
Andi Bushati:Vandalët që dhunuan Tiranën, e kanë me ne të gjithë
Duke u ndier krenar që, si individë të pavarur, ai dhe Yuri Kim kanë arritur në të njëjtin përfundim, Bolino vazhdonte: "Për muaj me radhë, në editorialet e mia dhe në debatet televizive, edhe unë e përcaktoj opozitën si ''ish-pushtetarë'', dhe jo për të zvogëluar rolin e saj, por vetëm për të kujtuar se ajo që sot paraqitet si opozitë ka në të vërtetë gabimet dhe përgjegjësitë e të qenit në pushtet deri në shtatë vjet më parë".
Ngjashmëria e të dyve për rolin e ish-pushtetarëve është e frikshme.
Urojmë që amerikania Yuri Kim mos jetë në një mendje me italianin Bolino edhe për sa i përket mënyrës se si u ekzekutua Klodian Rasha. Në gazetën e drejtuar prej tij si lajm kryesor u shfaq "fakti" se viktima qe i armatosur me një pistoletë në dorë dhe ia drejtoi atë policit.
©Lapsi.al
