Opozita dhe mazhoranca gjenden më afër se asnjëherë më parë, në dakordësimin për reformën zgjedhore. Negociatat mes palëve, me ndërmjetësimin e ndërkombëtarëve kanë vijuar gjithë kohës, dhe sot pasdite, pritet vetëm formalizimi i akordit, në një mbledhje të Këshillit Politik, të thirrur në orën 19:30.
Pika e vetme ku kishin ngecur bisedimet, kishte të bënte me treshen jo politike, të komisioneve zgjedhore. Burimet bëjnë të ditur se kjo çështje është zgjidhur.
Kontestimet e opozitës kishin të bënin me formulën, se si do të përzgjidhen dhe kush i emëron ata. Një shqetësim legjitim, për të shmangur ndikimin e qeverisë tek komisionerët dhe numëruesit, duke qënë se administrata nga ku do të vinin funksionarët që do administronin zgjedhjet është totalisht e politizuar dhe nën presionin e mazhorancës.
Ende nuk dihet saktësisht se si kjo problematikë është tejkaluar, por mësohet se Opozita është në akord të plotë me ndërkombëtarët. Pritet tashmë, miratimi i variantit, nga qeveria.
