Gati 3 dekada më parë babai i saj Azem Hajdari do të hidhte firmën i pari në themelimin e të parës parti politike pas diktaturës së gjatë. Tashmë Rudina Hajdari ka vendosur të bëjë konkrete deklaratën e hedhur pak ditë më parë në parlament se po shikohej mundësia për të garuar në zgjedhjet e 30 qershorit si alternativë. Burimet e lapsi.al thanë se emri i kësaj force të re do të jetë “Bindja Demokratike”.
Por në këtë nismë të vështirë duket se Rudina Hajdari nuk është e vetme. Mesohet se ajo ka në krah edhe një tjetër emër të njohur të selisë blu. Ish-nënkryetari i PD-së, Astrit Patozi është angazhuar së bashku me Hajdarin si nismëtar i kësaj force. Mësohet se janë zhvilluar disa takime dhe po pubohet për mbledhjen e 3 mijë firmave që nevojiten për tu regjistruar në gjykatë.
Burimet thanë se javën që vjen do të bëhet zyrtarizimi i partisë dhe më pas edhe regjistrimi në zgjedhjet lokale. Hajdari u shpreh hapur kundër bojkotit të zgjedhjeve duke e konsideruar atë si vetëvrasje politike. Nuk është e qartë nëse partisë së Hajdarit do t’i bashkohen edhe anëtarë aktualë të Partisë Demokratike apo vetëm “garda e vjetër” e lënë mënjanë kur në krye të demokratëve erdhi Lulzim Basha. ©LAPSI.al
