Ministrja e Marrëdhënieve me Parlamentin Elisa Spiropali, referuar ngjarjes që ndodhi sot në Ministrinë e Brendshme, godina e së cilës u ngjyros me të zezë nga protestuesit, është shprehur se për 5 vite rradhazi opozita nuk ka lënë rast pa hedhur bojë të zezë ndaj Policisë së Shtetit.
“Në 5 vite e gjysmë opozita nuk ka lënë rast pa hedhur bojë të zezë në mënyrë sistematike dhe të llogaritur mirë për të cënuar besueshmërinë e një prej shtyllave të shtetit, që është Policia e Shtetit. Me qindra e mijëra deklarata shtypi, qindra emisione televizive, deputetë të opozitës të dirigjuar për të goditur Policinë e Shtetit, telenovela me Babale e me drogë, që janë skenare të mirëmenduar për të shkatërruar moralin e Policisë së Shtetit dhe për t’i bërë një dëm të rëndë vendit”, tha Spiropali.
Organet e Policisë së Shtetit tha Spiropali kanë kontribuar në ruajtjen dhe garantimin e drejtësisë në vend.
“Ky vend ka policë të vrarë, nuk ka gjykatës e prokurorë të vrarë. Opozita nuk e ka pasur me ministrat e Brendshëm të PS-së, por e ka pasur dhe e ka me cënimin e sigurisë dhe stabilitetit në vend. Më parë punonin si ngastra të pavarura, sepse drejtoheshin nga klane të caktuara. Në më pak se 1 vit e gjysmë janë organizuar 24 operacione të profilit të lartë me arrestimin e 280 të dyshuarve për përfshirje në grupe kriminale. 14 grupe kriminale janë goditur dhe 27 milionë euro të dyshuara me prejardhje të paligjshme u janë hequr kriminelëve”, tha ajo.
