Kryeprokurorja Arta Marku ka marrë pjesë në analizën vjetore të prokurorisë në Shkodër. Marku është solidarizuar me prokurorët, duke u shprehur se e kupton që për ta ka qenë një vit i vështirë për shkak të proçesit të Vettingut dhe vendosjes në qendër të debateve politike dhe mediatike.
"Viti që shkoi nuk ka qenë jo i lehtë, pasi për shumë prej jush ka filluar procesi i vetingut. Shpesh herë jeni ndjerë të pasigurt dhe kjo ka ndikuar në punën tuaj dhe keni qenë të pamotivuar. Përveç kësaj, në qendër të çdo konflikti apo debati politik u është referuar ju.Politika i ka dhënë vetes të drejtë që të gjykojë çdo çështje që mund të ketë prekur interesat e saj, pa patur dëshirë dhe vullnet për të pritur, për të lejuar prokurorët të bëjnë punën e tyre.
Duke marrë shkas nga përfolja që politika i ka bërë prokurorisë, të njëjtën gjë ka bërë edhe opinionin publik edhe media", u shpreh Marku.
Më tej, ajo i ka kërkuar prokurorëve ta ushtrojnë funksionin e tyre të pa ndikuar nga ndërhyrje të brendshme apo të jashtme, duke i garantuar se do të kenë mbështetjen e saj institucionale dhe personale.
"Pavarësi do të thotë ushtrimi i funksionit të pavarur nga çdo ndërhyrje e brendshme apo e jashtme. Keni mundësinë që të pandikuar nga askush të jepni më të mirën në çdo vendimmarrje.Do të kërkoja prej jush që të mos e shikoni procesin e vettingut si një ndëshkim, por si një mundësi për rikthimin e dinjiteti. Vazhdoni të punoni dhe keni gjithë mbështetjen time institucionale dhe personale. Po kështu keni mbështetjen e faktorit kombëtar dhe ndërkombëtar", tha Arta Marku.
