Prokurori i Krimeve të Rënda, Besnik Muçi e ka kaluar me sukses Vettingun. Ai është konfirmuar në detyrë nga Komisioni i Pavarur i Kualifikimit.
Pas skualifikimit nga gara për Prokurorinë e Përgjithshëm, Muçi kandidon për Këshillin e Lartë të Prokurorisë, e ndërsa ditën e djeshme u përball me KPK-në që përfaqësohej në këtë proces nga Lulzim Hamitaj, Brunilda Bekteshi dhe Olsi Komici.
Sipas vendimit të bërë publik sot nga KPK, Muçi e ka kaluar me sukses Vettingun.
Prokurori e ka nisur karrierën në vitin 2002 si prokuror në Prokurorinë e Tiranës. Në vitin 2007, Muçi kaloi në Policinë e Shtetit ku mbajti postin e drejtorit të Drejtorisë kundër Krimit Financiar deri në gusht të vitit 2008. Prej asaj kohe, ai ushtron detyrën e prokurorit në Prokurorinë e Krimeve të Rënda.
Prokurori, më herët, u skualifikua nga gara për Prokuror të Përgjithshëm me argumentin se nuk përmbushte kriterin e vjetërsisë në punë, pasi i mungonin vetëm 15 ditë.
