Këto janë pamjet kur pesë persona të maskuar tentojnë të grabisin një dyqan.
Ngjarja ka ndodhur në qytetin e Laçit më 1 qershor në orën 03:00 të mëngjesit në lagjen nr.3 të qytetit pranë rrugës së tregut.
TV Klan ka siguruar pamjet e kamerave të sigurisë kur autorët me maska në fytyrë ndaluan pranë dyqanit që synonin të grabisnin.
Ka qenë ora ekzaktësisht 02:53 minuta kur pesë grabitësit zbritën nga një automjet ngjyrë gri tip “Mercedes-Benz E-Class”.
Me leva nëpër duar, ata tentuan të shqyenin derën kryesore të dyqanit që ndodhet në qendër të qytetit, vetëm 100 metra larg stacionit të policisë.
https://www.youtube.com/watch?v=mSbBv3LMFJQ&feature=youtu.be
Përpjekjet e tyre dështuan dhe u larguan rreth 10 minuta më vonë pasi nuk mundën dot të hynin në dyqan.
Pronari i biznesit ka thënë për Klan se ngjarjen e ka denoncuar në polici dhe deri tani uniformat blu nuk i kanë dhënë asnjë përgjigje.
Ai shprehet se policia nuk ka identifikuar asnjë prej autorëve që tentuan t’i grabisnin dyqanin, pavarësisht se targat e automjetit të tyre mund të verifikohen me lehtësi.
Të njëjtën natë, pra në orët e para të mëngjesit të 1 qershorit, në Mamurras është grabitur një dyqan me bizhuteri, që dyshohet të jetë nga kryer nga të njëjtët persona.
Edhe pse biznesi i qytetarit në fjalë është 100 metra larg stacionit policor, ai ka shprehur shqetësim për faktin se asnjë patrullë policie nuk qarkullon në atë zonë.
