Situata e zjarreve në Ulëz të Matit mbetet kritike. Prej tre ditësh, flakët kanë dalë jashtë kontrollit dhe kanë përfshirë Lundërën dhe masivin pyjor të Trodhenit. Gjatë natës, zjarri u përhap edhe drejt fshatit Madhesh. Flakët po rrezikojnë ferma dhe bagëti. Sipas banorëve, në një prej fermave ndodhen rreth 250 lopë, si edhe dele, dhi dhe koshere bletësh. Disa krerë bagëtish rezultojnë të humbur që prej nisjes së zjarrit.
Zona është mbuluar nga tymi i dendur. Pavarësisht ndërhyrjes së një helikopteri prej dy ditësh dhe forcave në terren, vatrat ende nuk janë izoluar. Deri tani raportohet se janë djegur qindra hektarë pyje me pisha, dushqe dhe bimësi të tjera. Banorët kërkojnë më shumë ndërhyrje nga ajri. Sipas tyre, zjarri po avancon drejt territorit të Krujës, duke shtuar rrezikun e përhapjes së mëtejshme.
