Plagosje në Delvinë. Ngjarja e ndodhur ditën e sotme në Delvinë dyshohet se është pasojë e një konflikti të nisur rreth një javë më parë në Sarandë.
Gjashtë ditë më parë, në lagjen nr. 4 të Sarandës, në rrugën “Mitat Hoxha”, 45-vjeçari Xhike Hita, për motive banale, është konfliktuar dhe ka goditur me sende të forta dhe thikë nipat e 47-vjeçarit Lekan Tozo.
Konflikti është zhvilluar rreth mesditës së 14 gushtit. Pas ngjarjes, policia ka shoqëruar palët në Komisariat dhe ka nisur procedurat për ndjekjen e autorit në gjendje të lirë. Pas marrjes së ndihmës mjekësore, edhe të dëmtuarit kanë lënë spitalin.
Por, gjashtë ditë më pas, konflikti duket se është zhvendosur në Delvinë, ku Lekan Tozo është përballur me 45-vjeçarin Xhike Hita, i cili është gjithashtu me origjinë nga Delvina.
Dyshohet se mes tyre ka nisur një konflikt për shkak të plagosjes që Hita u kishte shkaktuar më herët nipave të Tozos. Gjatë përleshjes fizike mësohet se janë përdorur edhe armë të ftohta, duke rezultuar në plagosjen e lehtë të Xhike Hitës.
Ndërkohë, policia e Sarandës ka shoqëruar edhe disa persona të tjerë, familjarë të Tozos dhe Hitës, pasi pak minuta më herët ishin konfliktuar verbalisht në lagjen nr. 4 të Sarandës.
Policia vijon hetimet për të zbardhur plotësisht rrethanat dhe dinamikën e konfliktit.
Njoftimi i Policisë:
Delvinë/Informacion paraprak
Rreth orës 11:10, gjatë një konflikti në rrugë, për motive të dobëta, shtetasi L. T., 46 vjeç, banues në fshatin Rusan, Delvinë, dyshohet se ka goditur me mjet të fortë në fytyrë shtetasin Xh. H., 49 vjeç, i cili ndodhet në spital, jashtë rrezikut për jetën.
46-vjeçari është shoqëruar në Komisariat.
Grupi hetimor po kryen veprimet për sqarimin e plotë të rrethanave të ngjarjes.
