Dronët ukrainas kanë goditur rafinerinë e Omskut, më e madhja e Rusisë, e vendosur thellë brenda territorit rus në Siberi, në një nga sulmet më të mëdha ukrainase në territorin rus që nga fillimi i pushtimit rus të Ukrainës. Lajmi u njoftua nga ushtria ukrainase, por edhe autoritetet lokale ruse konfirmuan gjithashtu sulmin.
Në një deklaratë, Shtabi i Përgjithshëm i Ukrainës tha se sulmi shkaktoi një zjarr në rafinerinë e Omskut, e cila ndodhet rreth 2,700 km nga kufiri i Rusisë me Ukrainën dhe afër kufirit të Rusisë me Kazakistanin.
Në një postim në Telegram, guvernatori i rajonit të Omskut, Vitaly Khochenko, nuk specifikoi se cili ishte objektivi i sulmit, por tha se disa dronë ukrainas mbërritën në "zonën industriale veriore të Omskut", ku ndodhet rafineria.
Ai tha gjithashtu se ndikimi i plotë i sulmit po vlerësohet dhe se janë angazhuar shërbimet e emergjencës. Burime i thanë Reuters se rafineria e Omskut, në pronësi të Gazpromneft, përpunoi rreth 460 000 fuçi naftë në ditë, vitin e kaluar.
Ukraina po përshkallëzon një fushatë bastisjesh kundër rafinerive ruse të naftës, duke shkaktuar një mungesë të madhe karburanti në të gjithë Rusinë. ©LAPSI.al
