Nga ANSA/ Një mur i lartë metalik i ruajtur nga forcat e rendit rrethon qendrën e Gjadrit në Shqipëri, e ndërtuar sipas Protokollit Itali-Shqipëri për menaxhimin e migrantëve jashtë kufijve të Italisë.
Një vend që përmban histori izolimi dhe cenueshmërie, ku koha dhe hapësira janë koncepte të pezulluara dhe të pasigurta, si të drejtat e njeriut.
"Këtë na tha një burrë nga Senegali i mbajtur në këtë Qendër", - deklaroi Emanuele Longo, Koordinator Mjekësor i Programit të Emergjencave në Itali, në lidhje me misionin e monitorimit të Qendrave në Shqipëri.
“Burri na tha se në Qendrën e Gjadrit, ilaçet psikotrope përdoren shumë shpesh në mënyrë të papërshtatshme. Sipas vlerësimit të tij, dy nga tre persona të mbajtur atje i marrin ato", - vazhdoi Longo.
"Ai gjithashtu na shpjegoi se ai mbërriti në Itali falë ribashkimit familjar, ndoqi disa vite shkollë dhe e shndërroi lejen e qëndrimit në leje pune. Më pas humbi punën dhe bashkë me të edhe lejen e qëndrimit, duke u futur në rrjetin e Qendrave të Paraburgimit për Riatdhesim (CPR). Njerëzit mund të mbahen në CPR, si ai në Gjadër, deri në 18 muaj, në kushte pasigurie, privimi nga liria dhe vështirësi të zgjatura në mbajtjen e kontaktit me avokatët dhe anëtarët e familjes së tyre", - shpjegon Longo.
"Fakti i mospasjes së një lejeje qëndrimi të vlefshme nuk mund të justifikojë ndalimin administrativ dhe izolimin e këtyre njerëzve, e aq më pak në këto kushte patogjene, të cilat shkatërrojnë shëndetin e tyre fizik dhe mendor. Tre vjet pas nënshkrimit të Protokollit, “Emergjenca” bën thirrje edhe një herë për mbylljen e Qendrave në Shqipëri dhe kapërcimin e këtij modeli, i cili përfshin kosto të paqëndrueshme njerëzore, sociale dhe demokratike” - përfundon Longo. ©LAPSI.al
