Ministri i Mbrojtjes Ermal Nufi ka reaguar sot në 4 shtator, lidhur me raportimet për përfshirjen e dy efektivëve të Policisë Ushtarake në ngjarjen e ndodhur dje në Vlorë.
Nufi ka mohuar që dy efektivët të jenë truproja apo badigardë personalë të tij, duke sqaruar se ata janë pjesë e Policisë Ushtarake.
Sipas ministrit, efektivët kanë kryer në periudha të ndryshme edhe detyra të sigurisë dhe shoqërimit institucional, por nuk kanë qenë në shërbim ditën e ngjarjes. Ai thekson se çdo veprim i tyre, nëse konfirmohet nga autoritetet, është individual dhe jashtë detyrës institucionale.
Për këtë arsye, dy efektivët janë pezulluar nga shërbimi deri në përfundimin e verifikimeve. Ministria e Mbrojtjes, sipas Nufit, distancohet nga çdo veprim i paligjshëm dhe thotë se përgjegjësia do të përcaktohet vetëm nga organet kompetente.
Postimi i ministrit të Brendshëm Ermal Nufi
Qëndrimi i Ministrit të Mbrojtjes, Ermal Nufi në lidhje me ngjarjen e djeshme në Vlorë dhe raportimet e disa portaleve mbi përfshirjen e “dy truprojave të tij”
“Në lidhje me raportimet e disa portaleve për përfshirjen e dy efektivëve të Policisë Ushtarake në ngjarjen e ndodhur dje në Vlorë, e konsideroj të nevojshme të sqaroj opinionin publik se këta persona nuk janë truproja apo badigardë personalë.
Ata janë pjesë e Policisë Ushtarake, strukturë e Forcave të Armatosura me detyra dhe përgjegjësi të përcaktuara me ligj.
Efektivët e dyshuar janë pjesë e Policisë Ushtarake që nga viti 2006 dhe në periudha të ndryshme prej vitit 2018-të, ata kanë kryer edhe detyra të sigurisë, mbrojtjes dhe shoqërimit institucional të Ministrit të Mbrojtjes, por kjo nuk i bën ata punonjës personalë të ministrit dhe, aq më pak, nuk i lidh veprimet e tyre individuale me institucionin apo me ministrin.
Dua të theksoj gjithashtu se asnjëri prej dy efektivëve nuk ka qenë në shërbim ditën e ngjarjes në Vlorë.
Për rrjedhojë, çdo veprim i tyre në këtë ngjarje, nëse konfirmohet nga organet kompetente, është veprim individual dhe jashtë detyrës institucionale.
Ministria e Mbrojtjes distancohet qartësisht nga çdo veprim i paligjshëm dhe respekton plotësisht hetimin e organeve ligjzbatuese. Përgjegjësia individuale dhe rrethanat e ngjarjes do të përcaktohen vetëm nga autoritetet kompetente, në përputhje me ligjin.
Deri në përfundimin e verifikimeve, dy efektivët janë pezulluar nga shërbimi në Policinë Ushtarake. Ministria e Mbrojtjes mbetet e vendosur për respektimin e ligjit, disiplinës dhe integritetit profesional nga çdo efektiv dhe punonjës i strukturave të saj. Uniforma, autoriteti dhe detyra shtetërore nuk mund të përdoren për qëllime personale apo jashtë kuadrit ligjor.
Çdo shkelje e konstatuar do të trajtohet me seriozitetin e duhur dhe në përputhje me legjislacionin në fuqi.”
