Prokuroria e Posaçme Kundër Korrupsionit dhe Krimit (SPAK) shpalli pretencën për Samir Rosales Rodriguez, kimisti që do të ekstradonte kokainën nga laboratori i Frakullës në Fier. Prokurori Adnan Xholi kërkoi dënimin me 14 vjet burgim të Rodriguez dhe i tha gjykatës se autoritetet po presin ekstradimin e të pandehurit. Ai u arrestua në Kolumbi më 4 shtator të vitit të kaluar.
Sipas hetimeve, Rodriguez udhëtoi nga Kolumbia drejt Greqisë e më tej në Malin e Zi dhe në Shqipëri. Detyra e tij ishte të nxirrte kokainën e përzier në pleh organik. Sipas SPAK, ajo llogaritet të ishte afro 480 kilogramë. Sipas SPAK, Samir Rosales Rodriguez akuzohet për kryerjen e veprave penale “Trafikimi i narkotikëve” kryer në bashkëpunim në formën e posaçme të grupit të strukturuar kriminal, “Grup i strukturuar kriminal”, dhe “Kryerja e veprave penale nga organizata kriminale dhe grupi i strukturuar kriminal”.
Prokuroria e Posaçme mbylli hetimet në ngarkim të ish-kryetarit socialist të ish-komunës Frakull në Fier, Viktor Çervanaku dhe 10 personave të tjerë në dhjetor 2023, të akuzuar për trafikimin nga Kolumbia të 485.5 kg kokainë të përzier me pleh kimik. Në dhjetor të vitit 2024, Apeli i GJKKO la në fuqi dënimin me 89 vite burg për pjesëtarët e grupit.
Viktor Çervanaku u dënua me 10 vite burg, Enxhi Ferhati me 8 vite burg, Klajdi Kodra me 11 vite e 4 muaj burg, Bledar Matoshi me 8 vite burg, Denilson Çervanaku me 11 vite e 4 muaj burg, Zenel Çervanaku me 9 vite e 4 muaj burg, Redion Meshi me 9 vite e 4 muaj burg dhe Marildo Rona me 8 vite burg, pas përfitimit nga gjykimi i shkurtuar. Ndërkohë, Julian Malaj u dënua me 2 vite burg për veprën penale të “moskallëzimit të krimit”.
