Tre ditë pasi kryeministri Edi Rama dhe ministrja e Shëndetësisë, Evis Sala, njoftuan se trombektomia tashmë ofrohet si shërbim i plotë në QSUNT, gazetari Osman Stafa denoncon se pacientët vijojnë të dërgohen në spitalet private për ta marrë këtë trajtim.
Njoftimi u bë nga kryeministri në rrjetet sociale, ku shërbimi u paraqit si tashmë funksional për pacientët që pësojnë insult ishemik.
“Nga sot, trombektomia në QSUT ofrohet si një shërbim i plotë për qytetarët. Për herë të parë, pacientët me insult ishemik do të mund të trajtohen në QSUT (Qendra Spitalore Universitare “Nënë Tereza”) me trombektomi, aparatura moderne dhe një ekip të specializuar mjekësor,” shkruajti Rama në profilin e tij zyrtar.
Por gazetari Osman Stafa thotë se realiteti në QSUNT është krejt tjetër. Sipas tij, pajisja është vendosur në spital, por shërbimi ende nuk është funksional dhe disa pacientë që janë paraqitur për të kryer trombektominë janë referuar drejt privatit.
“Nuk e dija që do të arrinin deri në këtë pikë për një çështje që ndan jetën nga vdekja. Pas tre ditësh kam vërtetuar se pajisja është vendosur thjesht në dhomë, por nuk është në shërbim të pacientëve. Dhe ka qenë jo një, por disa pacientë. I fundit sot, i cili ka ardhur për të marrë shërbim, pasi ka dëgjuar lajmin e kryeministrit, por QSUNT e ka përcjellë tek privati pasi në QSUNT shërbimi nuk ofrohet,” denoncon gazetari.
Stafa thotë se njoftimi i kryeministrit dhe ministres së Shëndetësisë është një mashtrim publik
Sipas tij, Rama dhe Sala kanë gënjyer për një çështje që lidhet drejtpërdrejt me jetën e pacientëve, ndërsa denoncon se njerëz që janë paraqitur në QSUNT pikërisht pasi kanë dëgjuar njoftimin zyrtar janë përballur me faktin se shërbimi nuk mund të kryhet aty dhe janë orientuar drejt spitaleve private.
