Bekim Sejdiu, ka dhënë deklaratën e parë për media, pasi u propozua si president i Kosovës. Ai tha se gjatë negociatave mes VV-së dhe LDK-së, emri i tij ka arritur të jetë ai dakordues mes dy partive.
Ndër të tjera ai u shpreh se do t'u shërbej me devotshmëri popullit të Kosovës.
“Kjo mua më bën të ndihem i nderuar, besimi që më kanë dhënë përfaqësuesit e dy partive. Unë e kam pranuar këtë propozim, edhe pse ambicia ime ka qenë gjithmonë në fusha akademike. Duke qenë i vetdijëshëm edhe me barrën edhe përgjegjësinë që e sjell posti i presidentit, por edhe në kontekstin aktual politik, jam në shërbim të Kosovës, qytetarëve dhe shtetit tonë,.. që të shërbej me devotshmëri siç kam bërë gjithmonë”, u shpreh kandidati për president.
Një miniportret i tij nga gazetari Enver Robelli
Bekim Sejdiu do ta përfaqësonte Kosovën në mënyrë dinjitoze. Për këtë ai është jo vetëm i përgatitur mirë profesionalisht, por ka edhe një përvojë të gjatë e të respektueshme si shërbëtor lojal i institucioneve të Kosovës.
Duke qenë pjesëtar i «brezit të Republikës», siç i quante dr. Ibrahim Rugova në vitet ’90 djemtë dhe vajzat e Kosovës që, në kushte të rënda, nuk u dorëzuan, Bekim Sejdiu nisi rrugën e studimit të jurisprudencës në Universitetin e Prishtinës, ku u diplomua si jurist. Më pas përfundoi me sukses dy magjistratura: në fushën e marrëdhënieve ndërkombëtare në Universitetin e Bilkentit (2005), si dhe në fushën e demokracisë dhe të të drejtave të njeriut në Universitetin e Sarajevës dhe në Universitetin e Bolonjës (2001). Doktoroi në fushën e studimeve ndërkombëtare dhe diplomatike në Nova Univerza, në Slloveni, një universitet i njohur për studime të qeverisjes dhe të çështjeve evropiane. Aktualisht është profesor në Fakultetin Juridik të Universitetit të Prishtinës.
Si gjykatës në Gjykatën Kushtetuese, dr. Bekim Sejdiu ka mbajtur qëndrime parimore. Për shembull, më 2015, ai hapur dhe përmes një mendimi mospajtues kundërshtoi Asociacionin e Komunave me shumicë serbe, të cilin e quajti etnocentrik, të papërputhshëm me rendin kushtetues të Kosovës dhe në kundërshtim me parimet themelore të Kushtetutës.
Si diplomat dhe ambasador karriere, dr. Bekim Sejdiu e ka përfaqësuar Kosovën si ambasador në Ankara (2008-2012) dhe si konsull i përgjithshëm në New York (2012-2014). Kjo ishte faza kur Kosova mori shumicën e njohjeve ndërkombëtare, falë mbështetjes së SHBA-së dhe BE-së, por edhe punës së diplomatëve si Bekim Sejdiu e të tjerë.
Si në Ankara, ashtu edhe në New York, Bekim Sejdiu është nderuar nga shtetet mikpritëse për punën e tij: me Dekoratën e Asamblesë së Shtetit të New Yorkut, me Çelësin e qytetit Worcester (Massachusetts, SHBA) dhe me Medaljen nga Ministri i Punëve të Jashtme i Republikës së Turqisë. Falë angazhimit të tij në New York, ai është ndër diplomatët kosovarë më të respektuar nga lobi i rëndësishëm shqiptaro-amerikan.
Me këto virtyte, Bekim Sejdiu është një demokrat i përgjegjshëm, një personalitet publik që e di mirë vlerën e lëvizjeve politike e ushtarake për çlirimin e Kosovës dhe të shtetndërtimit, që arriti kulmin me shpalljen e pavarësisë së Kosovës.
Me natyrën e tij përbashkuese, me prirjen për të ndërtuar ura në mbrojtje të interesit publik dhe shtetëror, si dhe me kureshtjen e tij intelektuale, Bekim Sejdiu do ta avanconte nivelin e përfaqësimit të Kosovës edhe në arenën ndërkombëtare.
Deputetet dhe deputetët e Kuvendit të Kosovës të të gjitha partive do t’i bënin një shërbim shtetit me zgjedhjen e tij në postin e Presidentit.
