Radhë të gjata automjetesh janë krijuar këtë fundjavë në pikën kufitare të Qafë Botës, në jug të vendit, si pasojë e fluksit të lartë të udhëtarëve. Ngarkesa është vërejtur në të dyja anët e pikës së kalimit kufitar, ku qytetarët presin për përfundimin e procedurave të kontrollit.
Në 24 orët e fundit, në Qafë Botë kanë hyrë dhe kanë dalë rreth 10 mijë shtetas shqiptarë dhe të huaj. Sipas të dhënave nga pika kufitare, fluksi është më i madh në hyrje drejt Shqipërisë. Nga pala shqiptare janë në funksion katër sportele, ndërsa pala greke operon me dy sportele.
Fluksi i lartë lidhet me lëvizjet e turistëve dhe pushuesve gjatë sezonit veror, si dhe me qytetarët që udhëtojnë drejt Greqisë apo kthehen në Shqipëri. Autoritetet kufitare vijojnë punën për menaxhimin e situatës dhe për përshpejtimin e procedurave, me qëllim reduktimin e kohës së pritjes për udhëtarët.
