Deputetët e Partisë Demokratike të Kosovës vijuan edhe këtë të enjte protestën para Qeverisë, duke bllokuar hyrjet e godinës. Aksionit iu bashkuan edhe deputetë të Aleancës, si dhe asamblistë të PDK-së nga Vushtrria.
PDK kërkon thirrjen sa më shpejt të seancës konstituive të Kuvendit dhe zhbllokimin e procesit për ngritjen e institucioneve të reja.
Partia i ka kërkuar kryesuesit të seancës, Avni Dehari, të caktojë datën e vazhdimit të saj. Ndërkohë, ka akuzuar Lëvizjen Vetëvendosje dhe kryeministrin në detyrë, Albin Kurti, se po mbajnë të bllokuara institucionet. Edhe Aleanca ka kundërshtuar zvarritjen e procesit dhe ka kërkuar konstituimin sa më shpejt të Kuvendit. Ngërçi politik vijon, ndërsa Kuvendi ende nuk ka përfunduar procesin e konstituimit.
