Vetëm disa ditë pas një tragjedie të ngjashme, vjen lajmi për një tjetër lojtar kriketi që ka humbur jetën në fushë për shkak të një arresti kardiak. Ngjarja ka ndodhur sërish në Indi, ditën e Krishtlindjeve. Vijay Patel ishte duke marrë pjesë në një ndeshje kriketi – një sport shumë i popullarizuar në ato rajone – në një fushë në Jalna, Maharashtra, një rajon në Indi qendrore-perëndimore, me kryeqytet Mumbain. Pas një bisede të shkurtër me një shok skuadre, Patel po shkonte të merrte pozicionin e tij, kur pësoi sulmin fatal.
Një lojtar indian i kriketit vdes në fushë në moshën 32-vjeçare
Fillimisht ai u ul në gjunjë, pastaj u rrëzua në tokë. Vetëm në atë moment të pranishmit kuptuan rëndësinë e situatës dhe nxituan drejt tij. Turneu i quajtur “Christmas Trophy,” që po zhvillohej më 25 dhjetor në Jalna, u kthye papritur në një skenë tragjike: përpjekjet e dëshpëruara për ta shpëtuar duke përdorur reanimacion kardiopulmonar dështuan dhe 32-vjeçari u shpall i vdekur në spitalin më të afërt, ku u transportua menjëherë.
Organizatori i turneut: “Menduam se kishte një ngërç në këmbë”
“Fillimisht menduam se kishte një ngërç në këmbë – tregoi organizatori i turneut, Bhola Kamble – por pas një vëzhgimi më të kujdesshëm, kur e pamë të shtrirë në tokë, kuptuam se ishte në një gjendje serioze. U bë e qartë që kishte një problem me gjoksin. Në atë moment e çuam sa më shpejt të ishte e mundur në spitalin më të afërt, por mjekët e shpallën të vdekur”.
Vijay Patel kishte mbërritur në Jalna gjatë pushimeve të Krishtlindjeve dhe po merrte pjesë në një turne kriketi të organizuar nga dashamirësit lokalë të këtij sporti. Ndeshja po zhvillohej në mesditë, afër kohës së drekës, kur temperatura kishte kaluar 30 gradë Celsius. Asgjë nuk paralajmëronte tragjedinë, e cila çoi në ndërprerjen e menjëhershme të garës.
