Aldo Serena është një rast unik në futbollin italian, pasi ka luajtur në derbit e Milanos dhe Torinos duke veshur fanellat e të katër skuadrave: Inter, Milan, Juventus dhe Torino. Sulmuesi nga Montebelluna kujtohet gjithashtu për gabimin nga pika e penalltisë me fanellën e Italisë në gjysmëfinalen e Botërorit të Italisë ’90 kundër Argjentinës. “Pjesa më e keqe e karrierës sime,” shprehet sot 64-vjeçari. “Më shkaktoi probleme; mendoj se pata një krizë paniku. Këmbët më ishin tërësisht të ngrira, frymëmarrja ishte e çuditshme; portieri më dukej si një gjigant. Nuk kujtoj asgjë nga gabimi, as nga gjithçka që ndodhi më pas: një errësirë totale për dy ditë. E kam falur veten, sepse për të ecur përpara duhet të mbyllësh kapituj.”
Lexo më tej: Video/ Real Madrid është kampion i botës, tris ndaj Pachuca: Ancelotti bën historinë
Në arkivin e kujtimeve të bomberit shfaqet edhe një episod që ai nuk e kishte treguar më parë: një pështymë nga Carlo Ancelotti.
Serena zbulon incidentin me Ancelottin
“Nuk jam sqaruar kurrë as me Van Basten, që më hodhi rërë në fytyrë, dhe as me Ancelottin, që më pështyu. Por Carlo më bëri komplimente në Milan pas një ndeshjeje miqësore: më shtriu dorën,” tha Serena në një intervistë për Corriere della Sera, duke kujtuar gjithashtu disa nga bashkëlojtarët e tij të paharrueshëm. “Isha i dashuruar me Platininë për mënyrën si luante: kishte gjithçka që unë nuk kisha. Më dukej e pamundur që të ekzistonte një futbollist si Scirea: i mirë, i drejtë, konkurrues, por gjithmonë respektues ndaj të tjerëve. Me Nicola Bertin pata një miqësi terapeutike: unë i jepja stabilitet dhe ekuilibër, ndërsa ai më nxirrte lehtësinë dhe gëzimin. Takohemi ende.”
Jeta private e femrat: “Të ishe besnik ishte një sfidë e vështirë”
Në bisedë kishte vend edhe për jetën private të Serena si futbollist, i cili sot është analist për Sky Sport. Marrëdhënia e tij me Luisa Cornën asokohe pushtoi faqet e gazetave: “Mund të them që kur je i ri, luan futboll dhe je në qendër të vëmendjes, është e vështirë të frenosh pasionet e pranverës milaneze. Çmenduri për dashurinë? Në atë kontekst, të ishe besnik ishte një sfidë e vështirë. Nuk kam qenë ndonjë murg, përkundrazi. Por gjithmonë kam tentuar të ruaj balancat. Sot futbollistët kanë më pak liri për t’u argëtuar.”
