Nga kontrolli i sektorit të sigurisë me skanim të objekteve postare me pajisjet moderne të pajisur nga BE, u evidentuan dy koli të dyshimta me origjinë nga Tajlanda dhe një tjetër nga SHBA, ku u krijua dyshimi për lëndë narkotike të llojit marijuhane.
Çështja pasi iu referua prokurorit të gatshëm, u vendos të kryhet procedura me dorëzim të kontrolluar duke zëvendësuar lëndën narkotike. Rasti u ndoq nga strukturat përgjegjëse të Policisë me specialistët e antidrogës. Në vijim të hetimit dje u bë i mundur ndalimi i një shtetasi në Tiranë dhe po sot u krye ndalimi i një shtetasi tjetër në Elbasan.
Theksojmë se zbulimi i lëndës narkotike u krye në një bashkëpunim të shkëlqyer dhe në kohë reale midis specialistëve të doganës Tiranë, specialistëve të sigurisë të Postës Tranzite dhe Policisë së Shtetit nën drejtimin e Prokurorisë së Juridiksionit të Përgjithshëm Tiranë.
Detaje nga policia:
-Si rezultat i operacionit të koduar “Destinacioni 1” u godit një grup kriminal që trafikonte lëndë narkotike cannabis sativa nga Shtetet e Bashkuara të Amerikës në Shqipëri, nëpërmjet shërbimit postar. Për këtë veprimtari kriminale, u arrestua në flagrancë shtetasi Ermal Halili, 34 vjeç, banues në Elbasan, dhe u shpall në kërkim shtetasi E. D., 24 vjeç.
Në cilësinë e provës materiale u sekuestruan 2.3 kg cannabis sativa me përqindje të lartë TCH, e parashikuar për t’u shitur në Elbasan, me vlerën 45 000 euro, 170 gramë lëndë e dyshuar narkotike kokainë që u gjet në banesën e shtetasit E. D., shuma parash, celularë dhe automjete të përdorura për këtë veprimtari kriminale.
-Si rezultat i operacionit të koduar “Destinacioni 2” u godit një grup kriminal që trafikonte lëndë narkotike cannabis sativa nga Tajlanda në Shqipëri, nëpërmjet shërbimit postar. Për këtë veprimtari kriminale u arrestuan në flagrancë shtetasit: Bruno Lila, 19 vjeç dhe një shtetas 17 vjeç, të dy banues në Tiranë, si dhe u shpallën në kërkim shtetasit B. L., 18 vjeç dhe E. L., 18 vjeç.
Në cilësinë e provës materiale u sekuestruan 1.7 kg cannabis sativa me përqindje të lartë TCH, e parashikuar për t’u shitur në Tiranë, me vlerën 23 000 euro, shuma parash, celularë dhe automjete të përdorura për këtë veprimtari kriminale.
