Duhej të ishte një ditë feste për Milan dhe tifozët e tij, por e diela e 15 dhjetorit do të mbetet në histori si dita e madhe e protestës. Gjatë ceremonisë, Curva Sud nuk kurseu fishkëllimat për Zlatan Ibrahimovic dhe Giorgio Furlani, mendjet pas Milanit të teknikut Fonseca. Pas fishkëllimës së trefishtë të arbitrit Guida, i gjithë stadiumi shoqëroi daljen nga fusha të Leao dhe shokëve të tij me një breshëri fishkëllimash, duke mos kursyer askënd – nga lojtarët, te klubi dhe trajneri. “Kjo shoqëri nuk na meriton,” brohoritën ultrasit, të lodhur nga një skuadër që vazhdon të humbasë pikë dhe që, ende pa ardhur Krishtlindjet, është praktikisht jashtë garës për titullin kampion.
Protesta e organizuar vazhdoi edhe jashtë stadiumit
Curva Sud shpalosi një banderolë me një mesazh të qartë dhe të lehtë për t’u interpretuar: “Shoqëria Milan: ju kemi pritur dhe ju kemi mbështetur pa kushte, por mediokriteti juaj na ka lodhur. Drejtues të paaftë, shoqëri pa ambicie. Nuk jeni në nivelin e historisë sonë.” Frustrimi, me shumë gjasa, u amplifikua edhe nga prania e legjendave të shumta që morën pjesë në ceremoni: të shihje Van Basten, Gullit dhe Rijkaard, heronjtë e Milanit të madh të teknikëve Sacchi e Capello, dhe të gjitha trofetë e fituara në të kaluarën, për të krahasuar më pas spektaklin e ofruar nga kuqezinjtë aktualë, ishte tepër edhe për tifozët më të qetë dhe optimistë.
Vendimet e portugezit dhe performanca e skuadrës
Fonseca, me mbështetjen e klubit, vendosi Theo Hernandez dhe Calabria në pankinë (pa i futur fare në lojë), por kjo lëvizje nuk pati asnjë efekt mbi një skuadër tepër të parashikueshme, që krijoi probleme te Genoa vetëm kur arriti të kundërsulmonte në mënyrë vertikale. Fofana dhe Reijnders u konfirmuan si të pazëvendësueshëm, ndërsa shumica e lojtarëve të tjerë nuk arrijnë të ruajnë vazhdimësi në performancë. Të vetmet duartrokitje të mbrëmjes ishin për të rinjtë, të cilët nuk mbajnë përgjegjësi për dështimin e projektit deri tani: Jimenez ishte madje lojtari më i mirë i Milan, ndërsa Liberali dhe Camarda, ende të papjekur, u përshëndetën me dashuri të madhe nga tifozët kur u zëvendësuan.
Fati dhe tensionet me tifozët
Sigurisht, me pak më shumë fat (si traversa e Morata), Milan mund të kishte marrë tre pikët, por kjo nuk do të ndryshonte thelbin e problemit. Sidomos përçarja midis klubit dhe tifozëve duket e pariparueshme. “Na keni çarë ka*in,” dhe “Ne nuk jemi amerikanë” ishin disa nga thirrjet që dëgjoheshin në fundin e ndeshjes, duke përfshirë në kritikë edhe një ikonë si Ibrahimovic.
Lexo më tej: Kush janë futbollistët e Milan që sipas trajnerit “nuk bëjnë gjithçka për të fituar”
Milan mbetet ende në garë si në Champions League, ashtu edhe në Kupën e Italisë, por pa mbështetjen e tifozëve, është e vështirë të mendohet për një përfundim pozitiv të sezonit.
