Ish-mesfushori i Juventusit, Simone Muratore, ka njoftuar tërheqjen nga futbolli në moshën 26-vjeçare, pas një beteje trevjeçare kundër një tumori cerebral. Me fanellën bardhezi, Muratore ka luajtur në Serie A dhe në Champions League nën drejtimin e Maurizio Sarrit.
Në një postim emocional në Instagram, Muratore shkroi:
“Kanë kaluar 3 vite nga ai moment, një lajm që më erdhi si rrufe në qiell të pastër dhe ndryshoi jetën time dhe të atyre që më rrethojnë. Neurocitomë në ventrikulin e majtë. Çaste mendimesh, pyetjesh, zemërimi. Nuk kam derdhur asnjë lot, gjithmonë jam përpjekur të dukem i fortë për të tjerët, që nga dita e lajmit deri natën para operacionit, kur isha në dhomë me nënën time, gruaja më e fortë që kam njohur ndonjëherë. Atë natë shpërtheva në lot si një fëmijë, nga frika se nuk do të zgjohesha më, ose se do të zgjohesha por nuk do të isha më i njëjti person si më parë.”
Një betejë e gjatë dhe e dhimbshme
Muratore përshkroi vitet pas diagnozës si një periudhë të mbushur me vuajtje dhe sfida: “Ishte si të kthehesha një fëmijë dhe të rifilloja gjithçka nga fillimi. Kam mësuar sërish të flas mirë, të eci, të vrapoj, të shkruaj, të lexoj, të numëroj. Kishte ditë kur mezi ngrihesha nga shtrati, pavarësisht se ndihesha më mirë.”
Në fund të mesazhit të tij, ai bëri të ditur vendimin për t’i dhënë fund karrierës futbollistike: “Sot i vë një pikë karrierës time si futbollist. E provova deri në fund të rikthehesha, derdha lot dhe djersë, por nuk isha më ai i pari. Kuptova se isha me fat që isha shëruar dhe që isha mirë.”
Simone Muratore ka dhënë një shembull frymëzues të forcës dhe qëndresës në përballjen me sfidat më të vështira, duke e përmbyllur kapitullin e tij në futboll me dinjitet dhe mirënjohje për shëndetin e rikthyer.
