Kanë bërë xhiron e rrjeteve sociale pamjet tronditëse kur një foshnjë shihet duke dalë nga një qeli burgu sirian brenda asaj që njihej si “thertorja njerëzore” e presidentit tiran Bashar al-Assad.
Djali i vogël qëndron pranë dyerve të qelive të hapura dhe duket i hutuar teksa ushtarët rebelë bërtasin "Allahu Akbar" që do të thotë "Zoti është më i madhi" duke liruar qindra të burgosur.
Burgu ushtarak pranë Damaskut i quajtur “dhoma e torturës industriale” raportohet se ka parë nga 5 mijë deri në 13 mijë të burgosur të varur që nga viti 2011. Militantët hapën furishëm drynat në dyert e qelive të burgut Saydnaya për të liruar qindra të burgosura femra dhe të rinj pas përmbysjes së regjimit brutal të al-Asadit.
Në një video të postuar në X, gratë bërtisnin të gëzuara ndërsa liroheshin, ku disa prej tyre ishin burgosura për dekada. Ata u hipën në autobusë që prisnin jashtë burgut përpara se të dërgoheshin në shtëpitë e tyre.
“Ne festojmë me popullin sirian lajmin e lirimit të të burgosurve tanë dhe lirimin e zinxhirëve të tyre dhe shpalljen e fundit të epokës së padrejtësisë në burgun Saydnaya" - thanë rebelët.
Një hulumtim i Amnesty International thotë se autoritetet siriane kanë kryer krime kundër njerëzimit me mijëra të burgosur në burgun 30 km në veri të Damaskut duke i vrarë, torturuar dhe shfarosur. Ata përcaktuan se shkeljet e kryera në objektet brutale gjatë dekadës së fundit nën regjimin e diktatorit Bashar al Assad, i cili ka parë zhdukjen e mbi 10 mijë të burgosurve politikë, ishte pjesë e një sulmi kundër civilëve.
Mijëra njerëz u derdhën në rrugët e Homsit mbrëmë pasi trupat pro-regjimit u larguan ndërsa rebelët liruan mijëra të burgosur nga burgu i qytetit teksa forcat e sigurisë u larguan me nxitim pasi dogjën dokumentet e tyre. Assad e ka mohuar vrasjen e mijëra të burgosurve në Saydnaya, si dhe përdorimin e një krematoriumi sekret për asgjësimin e mbetjeve të tyre në vitin 2017.
Ai i cilësoi akuzat e Departamentit të Shtetit të SHBA-së për deri në 50 persona të varur çdo ditë në burgun brutal ushtarak si "një histori e re e Hollivudit të shkëputur nga realiteti". Gazetari Samer Daboul, xhaxhai i të cilit u arrestua për kontrabandë buke dhe u zhduk pas mureve të burgut në vitin 2012, pret me padurim lajmet në lidhje me njeriun që ishte “një nga njerëzit më me ndikim në jetën e tij”.
“Ai më mësoi për historinë e Sirisë, revolucionin dhe pse ishte i nevojshëm”, - tha ai për BBC. “Dua që ai të dijë se i riu që ai frymëzoi 12 vjet më parë është tani një gazetar që raporton për Sirinë. Unë dua që ai të jetë krenar për mua” - tha ai. Disa njerëz kanë hyrë në mediat sociale për të inkurajuar rebelët që të arrijnë në burgun famëkeq mizor dhe të çlirojnë të burgosurit e tij, ndërsa të tjerë shpresojnë se të afërmit e tyre, të cilët nuk i kanë parë apo dëgjuar prej vitesh janë ende gjallë. ©LAPSI.al
