Në javën e tetë të Premier League, duel për kreun midis Liverpool dhe Manchester City. Të kuqtë mbajnë vendin e parë me 21 pikë, pas fitores 2-1 kundër Chelsea të teknikut Maresca, me golat e Salah dhe Curtis Jones (për londinezët shënoi Jackson). Skuadra e Guardiolës ndjek me një pikë më pak, duke triumfuar në minutën e 95-të pas një përmbysjeje kundër Wolverhampton: Gvardiol barazoi avantazhin e Strand Larsen, dhe më pas Stones siguroi fitoren 2-1.
LIVERPOOL-CHELSEA 2-1
Liverpool rikthehet në krye, duke mposhtur Chelsean 2-1 në Anfield. Ndeshja nisi e ngurtë, pa asnjë nga skuadrat që mori iniciativën. Megjithatë, pak para minutës së 30-të, të kuqtë fituan një penallti pas faullit mbi Curtis Jones. Në minutën e 29-të, Salah nuk gaboi nga pika e bardhë, duke shënuar për 1-0. Skuadra e Marescës nuk reagoi menjëherë dhe pjesa e parë u mbyll pa shumë emocion.
Në fillim të pjesës së dytë, miqtë barazuan rezultatin: në minutën e 48-të, Caicedo asistoi perfekt për Nicolas Jackson, i cili shënoi golin e barazimit. Gëzimi i londinezëve zgjati pak, pasi tre minuta më vonë Salah asistoi për Curtis Jones, që shënoi golin e fitores 2-1. Chelsea u përpoq të barazonte përsëri, por energjitë e lojtarëve ranë. Në fund, Nkunku pati një shans për barazim, por nuk arriti të përfitonte nga krosimi i Pedro Neto-s. Liverpooli fiton 2-1 dhe rikthehet në krye të Premier League me 21 pikë. Chelsea mbetet në vendin e gjashtë me 14 pikë.
Lexo më tej: Video/ Premier League: Arsenal rrëzohet në shtëpinë e Bournemouth, United dhe Tottenham fitojnë
WOLVERHAMPTON-MANCHESTER CITY 1-2
Manchester City shpëton përsëri në fund, duke fituar 2-1 me përmbysje kundër Wolverhamptonit në Molineux. Që në fillim të ndeshjes, vendasit surprizuan me golin e Strand Larsen në minutën e shtatë. Pas këtij goli, Citizens nisën të kërkonin barazimin, duke dominuar posedimin e topit (gati 90% në pjesën e parë). Wolves u mbrojtën brenda zonës së tyre, por City arriti të barazojë me një goditje të jashtëzakonshme nga distanca: në minutën e 33-të, Gvardiol dërgoi topin në këndin e sipërm të portës, pavarësisht tentativës së portierit José Sá. Wolves rrezikuan përsëri para fundit të pjesës së parë, por mbijetuan me rezultatin 1-1.
Gjatë gjithë pjesës së dytë, skuadra e O’Neil u përpoq të vononte lojën, ndërsa lojtarët e Guardiolës nuk po arrinin të ndryshonin rezultatin. Kur gjithçka dukej e humbur për City-n, në minutën e 95-të, një goditje nga këndi e Foden u shfrytëzua nga Stones, që shënoi golin e fitores 2-1 dhe siguroi tre pikët. City ngjitet në 20 pikë në klasifikim, ndërsa Wolverhampton mbetet i fundit me vetëm një pikë.
