Projekti Rama-Meloni që krijoi një mekanizëm për trajtimin e refugjatëve jashtë kufijve të Bashkimit Europian ka nxitur polemika të forta në shumë vende të Bashkimit Europian, ku kërkohet zgjidhje për problemin e emigracionit. Në njërën anë qëndrojnë forcat e djathta që e kërkojnë prej kohësh një zgjidhje të ngjashme, ndërsa në anën tjetër janë partitë e majta dhe organizatat humanitare që fokusohen tek të drejtat bazë të njerëzve që kapen me varka në det.
Këto dy qëndrime janë bërë më të qarta, duke marrë shkas nga ajo që ndodhi në Gjadër ditën e djeshme, kur refugjatët e parë u sollën me anije nga Italia.
Përshëndetje nga Patriotët e Europës
Fraksioni politik "Patriotët e Europës" ku bëjnë pjesë partitë e ekstremit të djathtë të Gjermanisë, Francës, Holandës etj e kanë përgëzuar zgjidhjen që Meloni i dha problemit të refugjatëve në vendin e saj gjatë një takimi në Bruksel para mbledhjes së Këshillit Evropian, në takimin e parë të grupit të sapoformuar.
Migrimi ishte në qendër të diskutimeve të të djathtëve, që janë në kërkim të ideve të reja për t'i mbajtur emigrantët jashtë dyerve të Evropës.
“Pas një vizite në Ugandë, partia ime po shqyrton mundësinë e dërgimit të emigrantëve atje, në vend që t'i lejojë ata të qëndrojnë në Holandë, shpesh ilegalisht. Qeveria ime po punon gjithashtu për disa plane për të shtrënguar sa më shumë politikat në vendin tonë”, tha Geert ëilders, nga Partia e Lirisë së Holandës.
I pyetur për projektin që sapo ka nisur të funksionojë mes Ramës e Melonit, kryeministri Orban citohet të ketë dhënë përgëzimet e tij për Euroneës: “Marrëveshje e mirë. Urime!” ka thënë ai.
Komisioni Evropian ka propozuar 10 pika për çështjen e migracionit, disa prej të cilave përkojnë me qasjen ekstremiste ndaj çështjes: partneritetet me vendet e treta jo të BE-së dhe dërgimi i tyre në të ashtuquajturat "pika të kthimit" jashtë Bashkimit.
Por për Patriotët e Europës, kjo nuk mjafton.
“Deri më tani nuk kemi parë propozime të qarta. Të gjitha këto mbeten vetëm supozime. Dhe duke qenë se e di shumë mirë që Komisioni dëshiron migrimin, nuk kam besim se do ta zgjidhë problemin”, tha Marine Le Pen, presidente e Unionit Kombëtar.
Partia Patriotët, e përbërë nga 11 forca politike nga vende të ndryshme anëtare të BE-së, synon ta kthejë këtë nismë në një takim të rregullt. Ata janë grupi i tretë më i madh në Parlamentin Europian dhe vitet e fundit në të gjitha vendet e Bashkimit Europian kanë njohur rritje të konsiderueshme përfaqësimi.
Kryeministrja italiane Giorgia Meloni e ka përshkruar marrëveshjen si një “qasje e re, e guximshme, e paprecedentë që mishëron frymën evropiane dhe mund të përsëritet me vende të tjera jo anëtare të BE-së”.
Në një letër drejtuar liderëve të BE-së, të datës 14 tetor, presidentja e Komisionit Europian, Ursula von der Leyen shkroi se “me nisjen e operacioneve sipas protokollit Itali-Shqipëri, ne do të jemi në gjendje të nxjerrim mësime praktike nga kjo përvojë”.
Por disa organizata të të drejtave të njeriut kanë shprehur shqetësimet e tyre për qendrat. Pas njoftimit se qendrat nisën të izolojnë refugjatët e parë, Amnesty International Italia lëshoi një deklaratë për shtyp në të cilën përsëriti "shqetësimin e saj të fortë për shkeljet e mundshme të të drejtave të njeriut në lidhje me masat e parashikuara në Protokoll".
Organizata ECRE (Këshilli europian i refugjatëve dhe azilkërkuesve) paralajmëroi se ishte “e parashikueshme që modeli Itali-Shqipëri do të çonte gjithashtu në shkelje të të drejtave të njeriut si burgosje të plotë dhe mungesë sigurie ligjore”, duke shtuar: “Me modelin e Shqipërisë, qeveria italiane po anashkalon qëllimisht Ligji i BE-së dhe minimi i reformës së CEAS-it të miratuar së fundmi”.
Komiteti Ndërkombëtar i Shpëtimit (IRC) shkroi se ardhjet e para do të përfaqësonin një "ditë të errët për politikat e BE-së për azilin dhe migracionin". "Njerëzit e parë që mbërrijnë në qendrat e reja të paraburgimit të Italisë meritojnë më mirë sesa t'i nënshtrohen këtij eksperimenti të rrezikshëm politik (...) Këto qendra janë të kushtueshme, mizore dhe kundërproduktive dhe nuk kanë vend në një sistem azili njerëzor dhe të qëndrueshëm," tha IRC Itali. Drejtoresha e vendit Susanna Zanfrini./Lapsi.al
