Derbi edhe njëherë vishet i kuq. Tirana detyrohet të dalë e mundur 2-1 në ndërqytetasen që e nuk e fiton prej 7 takimesh. Dy gola të Maguette i kanë dhënë Partizanit suksesin në një ndeshje të bukur, me emocione e intensitet. Në avantazh me golin e mesfushorit në minutën e 15’, të kuqtë u arritën nga Abazaj. Në minutën e tretë shtesë pastaj vendosi një super gol i Maguette, që konsolidoi vendin në Final Four të Partizanit dhe nxorri Tiranën jashtë katërshes.
Këtë radhë, ndeshja kishte një peshë edhe më të veçantë, pasi në javët e fundit të kampionatit mund të ndikojë për praninë në “Final Four”. Ndoshta edhe për këtë u luajt hapur në kërkim të fitores me përgjigje e kundërpërgjigje. Golin e avantazhit e shënoi Maguette, goditja e devijuar e të cilit u bë e pakapshme për Kozin. Tirana reagoi me Abazaj, i pafat në minutën e 27’. Goditja e sulmuesit u përplas në traversë dhe pastaj në shpinën e portierit për të përfunduar jashtë. Nën një ritëm të lartë, përgjigjia e Partizanit erdhi me Rrapajn, goditja e të cilit u ndal nga portieri, e pastaj Keko goditi keq në një pozicion të favorshëm. Në përmbysjen e fronteve, pothuaj në një aksion identik Tirana barazoi. Qirko ndali goditjen e Deliut, por jo devijimin me kokë të Abazaj, që ktheu barazinë në fundin e pjesës së parë.
Pjesa e dytë ishte më ndryshe, me skuadrat më të kujdesshme, por ku dallohej një dominim i Partizanit i cili kërkoi më shumë golin. Gjërat u komplikuan për Tiranën në kartonin e dytë të verdhë të Jonuzit në minutën e 87’, por askush nuk parashikoi se Partizani do të përfitonte me shpejtësi. Maguette kompletoi ndeshjen e tij fantastike me golin e dytë në minutën e 93’, me një të majtë që nuk i la asnjë shans reagimi Kozit.
Tirana nuk kishte forca të krijonte diçka në portën e të kuqve në fund, edhe pse Hadroji u ndëshkua me të kuqe duke rikthyer barazinë numerike në fushë. Kështu, Partizani merr tre pikë që e mbajnë -1 nga vendi i dytë i Vllaznisë. Fagu rrezikon seriozisht, edhe pse vetëm një pikë pas Dinamos e Skënderbeut.
