Barazimi me Juventus zmbrapsi sulmin e bardhezinjve për vendin e dytë, por Milan kërkon të mbyllë sezonin sa më shpejt e të mendojë për të ardhmen. E duke folur për të ardhmen e kuqezinjve, pika e parë ka të bëjë me trajnerin, sepse pas ndeshjes drejtori ekzekutiv Giorgio Furlani 'mbrojti' Stefano Piolin dhe u përpoqt të shmangë thashethemet për zëvendësimin e tij të mundshëm. Sidoqoftë, për trajnerin aktual është koha për t'i thënë lamtumirë pas pesë sezonesh dhe mendimi prioritar i kuqezinjve për ta zëvendësuar është Julen Lopetegui.
Në pole position për pankinën është Julen Lopetegui
Shumë thashetheme kanë qarkulluar orët e fundit për trajnerin spanjoll dhe ardhjen e tij në krye të skuadrës kuqezi. Po aq e madhe edhe pakënaqësia e tifozëve, të cilët do të donin Antonio Conte. Kontaktet mes palëve janë të shpeshta dhe, sipas Gazzetta dello Sport, tashmë ka një projekt-marrëveshje që parashikon një kontratë trevjeçare me 4 milionë euro neto në sezon. Asgjë nuk është vendosur ende, por drejtuesit e kuqezinjve synojnë të shpallin trajnerin e ri në fund të kampionatit.
“Lopetegui nuk do ta kishte problem të përshtatej me Milan sepse është mësuar të punojë në skuadra të mëdha. E për rrjedhojë edhe në situata presioni dhe kërkesash të mëdha - tha ish-menaxheri i Romës Monchi për Gazzetta, duke ‘sponsorizuar’ bashkatdhetarin e tij –. E kam fjalën për Porto, Real Madrid, Kombëtarja Spanjolle, te Sevilla, situata në të cilat pritshmëritë janë buka e përditshme. Prandaj jam i bindur se Julen është një kandidat perfekt”.
Lexo më tej: Video/ Asnjë gol, një super Sportiello ndalon Juventus: Milan blindon vendin e dytë falë Thiaw
Lista e emrave të lidhur me stolin e kuqezinjve është e gjatë: nga ish-mesfushori Van Bommel te Paulo Fonseca, Thiago Motta (me perspektivë te Juventus), Christophe Galtier dhe Domenico Tedesco. Por Sergio Conceicao gjithashtu mund të rikthehet në garë, pasi ka rinovuar kontratën e tij me Porto deri në vitin 2028 dy ditë më parë. Por marrëveshja lidhej me rizgjedhjen si president të Pinto Da Costa, që humbi sfidën me Villas Boas.
