Të gjithë në sprint, erdhi janari. Në Superiore madje nuk presin as hapjen zyrtare të dritares dimërore të merkatos, sepse kanë nisur planet, si gjithnjë afat-shkurtër për të ndryshuar skuadrat, në tentativë për të ndryshuar fatet e sezonit. E me ndonjë përjashtim të vogël, kanë nisur spastrimet e gabimeve të bëra në verë, apo shitjet që kanë si qëllim vetëm arkëtim, pa benefite në aspektin teknik, si në rastin e Florent Hasanit te Tirana.
TË BLLOKUARIT
Tirana bashkë me Erzenin e Skënderbeun kanë edhe një merkato për të zhbllokuar. Por si ndodh rëndom në këto raste, lëvizja bëhet dhe lojtarët e piketuar mbërrijnë. Shijakasit presin të zyrtarizojnë sulmuesin Paul Seun Komolafe, që ka javë që stërvitet me ekipin, ndërsa lëvizjet e tjera të kërkuara nga Deliallisi duhet të presin. Në situatë të njëjtë është edhe Skënderbeu, që përpara se të nisë hyrje-daljet duhet të zgjidhë çështjen Bregu dhe 36 mijë eurot që janë në lojë. Sidoqoftë, korçarët kanë mbajtur pezull të gjithë ofertat e ardhura për Nikajn, Liçon e Rashicën.
Lexo më tej: Në Berat u sulmua arbitri, Tirana-Vllaznia përfundoi me rrahje: Disiplina përjashtime e pezullime pafund
SPASTRIMET
Partizani pastaj me ndryshimin e drejtimit teknik ka larguar të padëshirueshmit, që janë tre por mund të bëhen katër. Bilalit, Grezdës e Da Silvës mund ti bashkohet edhe Kocijan, ndërsa janari do të thotë fjalën në zërin e hyrjeve. Tre lojtarë ka larguar edhe Teuta: sulmuesit Mario Gjata e Aldi Gjumsi e mbrojtësin Ardit Iljazi. Po tre kanë lënë edhe Shkodërn, me Vllazninë që prishi kontratat me Dodev, Çeshmedjiev dhe Dragoshin. Dinamo, pas kërkesave specifike të Mehmetit, i ka lejuar daljen pas Ali Samake, edhe Amarildo Gjonit. Kukësi duhet të zëvendësojë De la Torren dhe Rashitin, ky i fundit i paprenueshëm për Nicën. Ndërsa Egnatia kryesuese u mbulua me Montenegron për shitjen e Isgandarli, por duhet të bëjë llogaritë edhe me daljen e mundshme të Paulauskas, që ka të interesuar të shumtë. Lëvizje të shumta e jemi ende në dhjetor…
