E treta në radhë. Vllaznia është një furi në dhjetor dhe e mbyll vitin në vendin e tretë, duke shkatërruar 5-0 Skënderbeun. Super performancë nga Ildi Gruda, trigolësh në javën e 18 të Superiores, ndërsa pokerin e kompletoi kapiteni Bekim Balaj dhe autogoli i Frashërit. Kuqeblutë distancohen nga korçarët dhe lënë pas edhe Tiranën, duke premtuar shumë për gjysmën e dytë të kampionatit.
Skënderbeu mendonte të bënte ekzaktësisht të kundërtën e ndeshjes që bëri në Loro Borici. Gvozdenovic pa të tijtë të shkërmoqeshin, duke mos qenë praktisht kurrë në lojë. Ekuilibri u prish në minutën e 29', kur Gruda shënoi golin e parë, në shtyllën e dytë. Vetëm goditjet standarde nuk mund ti japin Skënderbeut rezultatin, edhe pse ndeshja nuk pati shumë momente të rëndësishme, për pjesën e mbetur të pjesës së parë.
KUQEBLUTË DIFERENCOHEN NË PJESËN E DYTË
E si për ta përligjur konceptin, 4 minuta pas rifillimit Gruda, duke shfrytëzuar pasimin e Çobës, dyfishoi shifrat, pasi kaloi edhe portierin Alia. 2-0 i tronditi bardhekuqtë që ishin të mefshtë edhe kur ndonjë si Frenkly apo Liço shfaqej në anët e Qarrit. Stojanovic ishte i kujdesshëm në mbulim. Zotërimi i topit steril për skuadrën e Gvozdenovic nuk bënte punë dhe kundërsulmi i Vllaznisë fundosi çdo iluzion të teknikut serb. Në minutën e 75' Balaj firmosi trisin, duke shtyrë në rrjetë topin e grushtuar nga Aliaj, pas konkluzionit të Malës.
Lexo më tej: Vllaznia, fitore me përmbysje: Çoba, Gruda e Balaj i japin Mehmetit humbjen e parë në krye të Dinamos
Ndeshja është e mbaruar dhe 4 minuta më pas vjen edhe pokeri. Gruda realizoi trigolëshin e tij personal, ndërsa në shtesë ndër 'armiqtë' e Alias u shtua edhe Frashëri. Autogoli i mbrojtësit fiksoi rezultatin, që e ngjit Vllazninë në kuotën e 26 pikëve. Korçarët mbeten me 22, duke u kthyer edhe njëherë në rrezik përfshirje në zonën e poshtme të renditjes.
