Ish-kampioni paralimpik i Afrikës së Jugut, Oscar Pistorius, i dënuar për vrasjen e partneres së tij Reeva Steenkamp 10 vjet më parë, është liruar me kusht. Ish-atleti do të lirohet nga burgu më 5 janar. Komisioni përgjegjës për lirimin e parakohshëm shqyrtoi çështjen e tij dhe përcaktoi se "i burgosuri është i përshtatshëm për riintegrim social". Pistorius i kishte kërkuar Gjykatës së Lartë të Pretorias lirimin në vitin 2022. Por më 31 mars, bordi i lirimit me kusht arriti në përfundimin se "i burgosuri nuk e kishte përfunduar periudhën minimale të burgimit". Kështu, u vendos për një proces të ri në gusht 2024.
Në tetor, Gjykata Kushtetuese shqyrtoi dhe korrigjoi vendimin e marrë më 31 marsin e kaluar nga Gjykata e Pretorias. Ajo i kishte mohuar lirinë duke pretenduar se ish-kampioni paraolimpik nuk e kishte tejkaluar pragun e gjysmës së dënimit. Gjykatësi kishte konsideruar si datë referencë nëntorin e vitit 2017, kur Gjykata e Lartë e Apelit kishte rritur dënimin në 15 vjet, duke gabuar sipas Gjykatës Kushtetuese.
June Steenkamp, nëna e Reeva, nuk mori pjesë në seancën e lirimit me kusht. Por, në një letër drejtuar bordit të lirimit me kusht, ajo tha se ishte potencialisht "e shqetësuar për sigurinë e çdo gruaje" që binte në kontakt me Pistorius.
ÇFARË NDODHI NË 13 SHKURT 2013
Në të gdhirë, në një lagje banimi të Pretorias, në Afrikën e Jugut, Reeva Steenkamp, modelja 29-vjeçare, hyri në shtëpinë e të dashurit të saj Oscar Pistorius. E bëri, si gjithmonë, me kopjen e saj të çelësave: donte ta surprizonte kur të zgjohej në ditën e Shën Valentinit. Kampioni paralimpik i atletikës, megjithatë, ishte në gjumë dhe kishte dëgjuar vetëm një zhurmë. Sapo ka parë një figurë që ka hyrë në dhomë, ka marrë armën që mbante pranë shtratit dhe ka qëlluar. Disa të shtëna, dy ose katër në varësi të versioneve. Të shtënat e kishin goditur Reeva në kokë dhe krah, duke i shkaktuar vdekjen e menjëhershme.
GJYQI I GJATË DHE DËNIMI
Pistorius, paraatleti i parë në botë që konkurroi me atletë të aftë në Lojërat Olimpike të Londrës në 2012, gjithmonë mbështeti teorinë e aksidentit, por autoritetet nuk e besuan. Në gjyqin që tërhoqi vëmendjen e mediave mbarëbotërore, dënimi i parë në tetor 2014 ishte pesë vjet burgim për vrasje nga pakujdesia. Ndërsa në nëntor 2015 Gjykata e Lartë e Apelit të Afrikës së Jugut rrëzoi dënimin e atletit duke e shpallur atë fajtor për vrasje. Kjo bëri që çështja të kthehej në gjykatën e shkallës së parë për rigjykim. Kjo ndodhi në korrik 2016, kur gjykatësi Masipa i dha trembëdhjetë vjet dhe pesë muaj burg për vrasje.
