Me vetëm dy lojtarë të munguar nga lista e grumbullimit për dy ndeshjet kualifikuese, Sylvinho ka nisur të provojë gjithcka është përgatitur këto ditë në stërvitje. Kombëtarja shqiptare ka zhvilluar sot një ndeshje kontrolli brenda grupit. Një mundësi e mirë e brazilianit për të parë formën fizike e ritmin e skuadrës para ndeshjes së parë. Kuqezinjtë do të luajnë ndaj Moldavisë në 17 qershor dhe Ishujve Faroe në 20 për kualifikueset e Euro 2024.
Ndeshja u zhvillua në stadiumin “Elbasan Arena” me grupin që fillimisht punoi me disa ushtrime me topin. Tekniku Sylvinho e ndau ekipin në dy pjesë në këtë ndeshje stërvitore. Sulmi titullar kundër mbrojtjes titullare, për të aplikuar skemat e para anti-Moldavi. Për të plotësuar grupin, stafi teknik thirri për këtë ndeshje kontrolli edhe disa nga lojtarët e Kombëtares U-19. Djemtë e Ervin Bulkut kanë nisur ndërkohë grumbullimin për dy miqësoret ndaj Kosovës.
Lexo më tej: Muçi, sfida me gola e Uzunit e eksperiencën e Sadiku-Cikalleshit: “Duam të arrijmë në Europian”
Lojtarët janë shfaqur në formë të mirë, duke treguar përkushtim maksimal në këtë ndeshje kontrolli. Stafi teknik është shfaqur i kënaqur me paraqitjen dhe me përgjigjet e marra nga ky test stërvitor. I gjithë grupi është stërvitur normalisht dhe nuk ka asnjë lojtar e probleme fizike. Nga lista me 26 emrat mungojnë vetëm Jasir Asani dhe Kristjan Asllani, që priten të bashkohen brenda të hënës me ekipin.
https://youtu.be/6INGgvm1GZU
